ԵՐԵՎԱՆ, 5 օգոստոսի. /Նովոստի–Արմենիա/. «Սասնա ծռեր» խմբի անդամ Պավել Մանուկյանը դադարեցրել է հացադուլը, «Ազատություն» ռ/կ–ին տեղեկացրել է Մանուկյանի կինը։
Հուլիսի 27-ին ոստիկանությունը հաղորդեց, որ հուլիսի 26-ի լույս 27-ի գիշերը ոստիկանության պարեկապահակային ծառայության (ՊՊԾ) գնդի տարածքում տեղի է ունեցել փոխհրաձգություն, որի հետևանքով վիրավորվել է իրավապահներից մեկը, ինչպես նաև Պավել Մանուկյանն ու նրա որդին՝ Արամ Մանուկյանը: Վերջիններս տեղափոխվել են «Էրեբունի» բժշկական կենտրոն։
Այնուհետև Պավել Մանուկյանին ու նրա որդուն՝ Արամ Մանուկյանին մեղադրանք առաջադրվեց շենք-շինություններ զավթելու և ապօրինի զենք-զինամթերք պահելու համար, և նրանք երկու ամսով կալանավորվեցին, «Էրեբունի» բժշկական կենտրոնից տեղափոխվեցին «Դատապարտյալների հիվանդանոց» քրեակատարողական հիմնարկ։ Պավել Մանուկյանը, չընդունելով մեղադրանքները, հացադուլ էր հայտարարել։
Նախօրեին կալանքի տակ գտնվող «Հիմնադիր խորհրդարան» ընդդիմադիր շարժման առաջնորդ Ժիրայր Սեֆիլյանը կալանավայրից նամակ էր հղել Պավել Մանուկյանին և խնդրել դադարեցնել հացադուլը։ –0–