ԵՐԵՎԱՆ, 27 ապրիլի. /Նովոստի Արմենիա/. Ընդդիմության առաջնորդ Նիկոլ Փաշինյանն ուրբաթ լրագրողների հետ հանդիպմանը մեկնաբանել է նախօրեին հանրահավաքի ժամանակ արած այն հայտարարությունը, որ կամ ինքը կընտրվի Հայաստանի վարչապետ կամ երկրում ընդհանրապես չի լինի կառավարության ղեկավար:
«Թեման այն չի, թե ով կլինի վարչապետ` պաշտոնակռվի մասին չէ խոսքը, այլ ճգնաժամի լուծման մասին։ Այսօր քաղաքացին զարթոնք է ապրում, և մենք դավաճանած կլինենք այդ զարթոնքը, եթե չլուծենք այս քաղաքական ճգնաժամը։ Հակառակ դեպքում կնվաստացվի հայ ժողովուրդի արժանապատվությունը», - ասաց Փաշինյանը:
Загружается новость ... "Лево"
Նա վստահություն է հայտնել, որ եթե Հանրապետական կուսակցությունն ու խորհրդարանը քվեարկեն Կարեն Կարապետյանի կամ ՀՀԿ-ի այլ թեկնածուի օգտին, ապա քաղաքական ճգնաժամն երկրում չի լուծվի, այլ հակառակը` կխորանա:
«Մեր դիրքորոշումը հասկանալի է, կարծում ենք, որ ժողովուրդի հաղթանակը պետք է ամրագրվի նաև դե–յուրե: Հարցը նրանում է, թե ցանկանու՞մ է արդյուք ՀՀԿ-ն լուծել այս ճգնաժամը: Եթե այդ պաշտոնում ընտրվի ՀՀԿ-ի ներկայացուցիչ, ապա ճգնաժամը չի լուծվի, քանի որ մենք կշարունակենք ակցիաներն ու խաղաղ ցույցերը, և կփորձենք բացատրել ՀՀԿ-ի ներկայացուցիչներին, օրինակ, Կարեն Կարապետյանին, ինչպես բացատրեցինք Սերժ Սարգսյանին, որ ինքը չի հասկանում երկրի քաղաքական իրավիճակը», - ասաց Փաշինյանը:
Ընդդիմության առաջնորդը կոչ արեց մայիսի 1-ին, երբ խորհրդարանում կընթանան վարչապետի ընտրությունները, առավոտից լինել Երևանի կենտրոնում ու լցնելփողոցներն ու հրապարակները, այդ թվում` խորհրդարանի շուրջ:
«Իսկ եթե վարչապետի ընտրությունները ձախողվեն ու խոսք գնա արտահերթ խորհրդարանական ընտրությունների մասին, ապա մենք կբոյկոտենք այդ ընտրությունները: Չեմ բացառում, որ կշրջապատենք ու կարգելափակենք, սակայն այս անգամ ընտրատեղամասերը», - ասաց Փաշինյանը:
Ապրիլի 27-ին առավոտյան նախատեսվում էին բանակցություններ ՀՀ վարչապետի պաշտոնակատար Կարեն Կարապետյանի ու ընդդիմության առաջնորդ Նիկոլ Փաշինյանի միջև, սակայն Կարապետյանն այդ բանակցություններն անհեռանկարային է անվանել`նշելով, որ Նիկոլ Փաշինյանի հերթական հրավերը նախորդից պրակտիկորեն չի տարբերվում:
Հայաստանում ապրիլի 13–ից մեկնարկած մասշտաբային բողոքի ակցիաների ֆոնին ապրիլի 23–ին ՀՀ վարչապետ Սերժ Սարգսյանը հրաժարական տվեց։ Նույն օրը ՀՀ նախագահ Արմեն Սարգսյանն ընդունեց կառավարության հրաժարականը։ Ապրիլի 25-ին կայացած հանրահավաքին Նիկոլ Փաշինյանն առաջադրվել է որպես վարչապետի թեկնածու: Վարչապետի ընտրությունները կկայանան մայիսի 1-ին Ազգային ժողովում:–0–
