Կարեն Կարապետյանը կանդամակցի՞ ՀՀԿ–ին, թե՞ ոչ

ԵՐԵՎԱՆ, 5 հոկտեմբերի. /Նովոստի–Արմենիա/. Իշխանության ներկայացուցիչները չեն բացառում, որ վարչապետ Կարեն Կարապետյանն իր թիմակից անկուսակցական նախարարների հետ միասին նոյեմբերի 26-ի սպասվող ՀՀԿ համագումարի ժամանակ կմտնի Հանրապետական կուսակցություն, գրում է «Հայկական ժամանակը»։

Թերթի հաղորդմամբ, ՀՀԿ-ին անդամակցելու դեպքում Կարեն Կարապետյանը կարող է հայտնվել կուսակցության ղեկավար կազմում և կդառնա փոխնախագահ։

Որոշ տեղեկությունների համաձայն՝ վարչապետը չի շտապում ՀՀԿ-անալ, բայց այդ սպասումները նրանից ունի ՀՀԿ վերնախավը։

«Եվ եթե նա այս տարի չմտնի կուսակցություն, ապա մինչև հաջորդ տարվա խորհրդարանական ընտրությունները անպայման մտնելու է»,– նշում են հոդվածի հեղինակները։

Հոդվածի հեղինակները փորձել են ՀՀԿ մամուլի խոսնակ Էդուարդ Շարմազանովից պարզել, թե Կարեն Կարապետյանին կուսակցությանն անդամակցելու առաջարկ եղե՞լ է։

«Դա պարոն Կարապետյանի և կուսակցության քննարկելու հարցն է։ Մինչև նոյեմբերի 26–ը ժամանակ կա, դանդաղ շտապեք, այդ օրը կգա, և եթե մտնի, մի զարմացեք, եթե չմտնի, էլի մի զարմացեք։ Անկախ այն հանգամանքից նա կուսակցական է, թե ոչ, մեր քաղաքական թիմի անդամ է», – նշել է Շարմազանովը։ –0–