ԵՐԵՎԱՆ, 19 հոկտեմբերի. /Նովոստի–Արմենիա/. ՀՀ ԱԺ–ն չորեքշաբթի արտահերթ նիստի ժամանակ երկրորդ և վերջնական ընթերցմամբ ընդունել է «Նոտարիատի մասին» օրենքում նախատեսված փոփոխություններն ու լրացումները և մի շարք հարակից օրենքներ։
Ինչպես նշեց ՀՀ արդարադատության նախարար Արփինե Հովհաննիսյանը, նախագծով նախատեսվում է հնարավորություններ ստեղծել «մեկ պատուհանի» սկզբունքով նոտարական ծառայություններ տրամադրելու համար։
«Մասնավորապես, նախատեսվում է ներդնել էլեկտրոնային նոտարի համակարգ, որը թույլ կտա իրականացնել նոտարական գործողություններ` էլեկտրոնային ստորագրության կիրառմամբ։ Ամեն ինչ կիրականացվի միասնական համակարգի միջոցով, ինչը թույլ կտա կրճատել ժամանակն ու ռեսուրսները, ինչպես նաև խուսափել փաստաթղթերի կեղծիքներից», – ասաց Հովհաննիսյանը։
Նրա խոսքով` օրինագծով նաև առաջարկվում է ներդնել լիազորագրերի էլեկտրոնային ռեեստր, ինչը կնվազեցնի դրանց կեղծման ռիսկը։ Նախատեսվում է նաև գործարկել կտակների և ժառանգության մասին գործերի էլեկտրոնային ռեեստր` բարձրացնելով դրանց ընթացակարգերի իրականացման անվտանգությունը։
Նախարարի խոսքով` նախատեսվում է նաև դյուրացնել և ավտոմատացնել ժառանգության հետ կապված բոլոր ընթացակարգերը։
Նորամուծությունների թվում նա նաև նշեց նոտարների պատասխանատվության ավելացման հարցը, նրանց կողմից որակյալ նոտարական ծառայություններ տրամադրելու երաշխիքը։
«Կարևոր նորամուծություն է նաև նոտարների նկատմամբ պահանջների ավելացումը, մասնավորապես, սահմանված է տարիքային ցենզ (25 տարեկան), պարտադիր պահանջվում է մեկ տարվա ստաժ, ինչպես նաև ներդրվել են նոտարների նյութական պատասխանատվության մեխանիզմներ, ովքեր պարտավոր կլինեն փոխհատուցել անզգուշության հետևանքով հասցված վնասը», – ասաց Հովհաննիսյանն ու ավելացրեց, որ կստեղծվի պահուստային ֆոնդ, որտեղից կտրամադրվեն փոխհատուցումները։ –0–
