ՀՀ ոստիկանությունը կոչ է անում լրագրողներին օգտագործել իրենց տարբերակելու հնարավորություն տվող լրացուցիչ միջոցներ
ԵՐԵՎԱՆ, 21 ապրիլի./Նովոստի–Արմենիա/. ՀՀ ոստիկանությունը հանդես է եկել հերթական հայտարարությամբ, որում ցուցարարներին զսպվածության կոչ է արել, իսկ լրագրողներին հորդորել է օգտագործել իրենց տարբերակելու հնարավորություն տվող լրացուցիչ միջոցներ:
Հայտարարության մեջ նշվում է, որ ապրիլի 20-ի առավոտից Երևանում ապօրինի հավաքի կազմակերպչի կոչով հավաքի մասնակիցների կողմից շարունակվում են հակաիրավական տարատեսակ գործողությունները, որոնք լրջորեն խաթարել են մայրաքաղաքի բնականոն կենսագործունեությունը, խախտել քաղաքացիների իրավունքներն ու ազատությունները, կազմակերպությունների բնականոն գործունեությունն ու օրինական շահերը:
«Այդ գործողությունները, չնայած կազմակերպիչների կողմից արվող արտաքուստ «խաղաղության» և «հանդարտության» կոչերին՝ մայրաքաղաքի տարբեր հատվածներում ձևավորել և խորացրել են հասարակական տարբեր խմբերի, անհատների միջև և հատկապես հավաքի մասնակիցների կողմից իրենց ծառայողական պարտականությունը կատարող ոստիկանության աշխատակիցների նկատմամբ ատելության ձգտող փոխադարձ անհանդուրժողականության մթնոլորտ։ Առանձին դեպքերում նկատելի են ոստիկաններին հավասարակշռությունից հանելու, նրանց նկատմամբ բռնություն կիրառելու դրսևորումներ, կան տեղեկություններ նաև հավաքի մասնակիցների և այլ քաղաքացիների միջև բախումների վերաբերյալ», – նշվում է ոստիկանության հայտարարության մեջ։
«Հավաքի մասնակիցներին կոչ ենք անում խուսափել հետագա հակաիրավական վարքագիծ դրսևորելուց, հասարակական անվտանգության դեմ ուղղված գործողություններ կատարելուց, ցուցաբերել զսպվածություն, լինել օրինապաշտ և գործել «Հավաքների ազատության մասին» ՀՀ օրենքով սահմանված իրավակարգավորումների շրջանակում։ Նկատի ունենալով ստեղծված իրավիճակը՝ առանձին դեպքերում հավաքի մասնակիցների կողմից խառնաշփոթ ստեղծելու փորձերը, կոչ ենք անում հարգելի լրագրողներին՝ որևէ կերպ չխոչընդոտել ոստիկանների իրավաչափ գործողություններին, նրանց տեղաշարժերին, մասնագիտական գործունեությունն իրականացնել բացառապես անվտանգության տեսանկյունից բավարար, հավաքի վայրերից ողջամիտ հեռավորության վրա, ինչպես նաև ձեռնարկել ոստիկանների, քաղաքացիների համար որպես լրագրող իրենց տարբերակելու հնարավորություն տվող լրացուցիչ միջոցներ», – նշվում է հայտարարության մեջ։
Ապրիլի 13–ին «Ելք» ընդդիմադիր խմբակցության ղեկավար, «Քաղաքացիական պայմանագիր» կուսակցության ղեկավար Նիկոլ Փաշինյանը Երևանում անցկացնում է շուրջօրյա հանրահավաքներ Սերժ Սարգսյանի վարչապետության դեմ։ Ապրիլի 16–ից հանրահավաքները վերածվեցին քաղաքացիական անհնազանդության համաքաղաքային ակցիաների։ Բողոքներն ուղեկցվում են բախումներով ցուցարարների և իրավապահների միջև, մասնավորապես, Բաղրամյան պողոտայում, փողոցների և առանցքային մայրուղիների, ինչպես նաև պետական հաստատությունների շենքերի արգելափակմամբ։ Ապրիլի 17–ին կազմակերպված հանրահավաքի ժամանակ Փաշինյանը հայտարարեց «թավշյա» հեղափոխության մասին։–0–
