ԵՐԵՎԱՆ, 15 նոյեմբերի. /Նովոստի–Արմենիա/. ՀՀ–ում Ֆրանսիայի արտակարգ և լիազոր դեսպան Ժան–Ֆրանսուա Շարպանտիեն խորը երախտագիտություն է հայտնել հայ ժողովրդին զորակցության և Փարիզում գրանցված մի շարք ահաբեկությունների զոհերի հիշատակը հարգելու համար։
«Ցանկանցում եմ իմ երախտագիտությունը հայտնել բոլոր հայերին, ովքեր այսօր առավոտվանից ծաղիկներով, մոմերով և զորակցության խոսքերով գալիս էին Ֆրանսիայի դեսպանատան մոտ` զոհվածների հիշատակը հարգելու և սգո մատյանում իրենց գրառումը կատարելու համար։ Այս ամենն, անխոս, մեր երկու երկրների բարեկամության վերահաստատումն ու նոր դրսևորումն է։ Ցանկանում եմ խորը երախտագիտություն հայտնել նաև նրանց, ովքեր այսօր հայտնում են իրենց աջակցությունը», – ասաց նա շաբաթ օրը լրագրողներին Երևանում ահաբեկչության զոհերի հիշատակին կազմակերպված մոմավառության ակցիայից հետո։
«Ֆրանսիայի համար» խորագրով սգո արարողություն էր կազմակերպվել շաբաթ երեկոյան Երևանի Ֆրանսիայի հրապարակում։ «Մարսելիեզի» հնչյունների ներքո ակցիային մասնակցեցին ՀՀ նախագահ Սերժ Սարգսյանն ու պաշտոնատար այլ անձինք։ Հարյուրավոր մարդիկ Ռոդենի հեղինակած արձանի պատվանդանի մոտ էին բերում ծաղիկներ և մոմեր, փափուկ խաղալիքներ և պաստառներ, որոնց վրա ֆրանսիայի ժողովրդին հասցեագրված աջակցության և զորակցության խոսքեր էին գրված։
Ծնողների հետ միասին Ֆրանսիայի հրապարակ էին եկել նաև երեխաներ, ովքեր ևս վառեցին փոքր մոմեր։ Մարդիկ լուռ մոտենում էին արձանին, դնում ծաղիկներ, աղոթում, շատերի աչքերին կարելի էր արցունքներ տեսնել։
Հայաստանի բնակիչները ծաղիկներ են դնում Ֆրանսիայի դեսպանատան շենքի առաջ >>
«Այս ամենը վերաբերում է մեզ բոլորիս։ Դուք գիտեք նախագահի (Ֆրանսիայի նախագահ Օլանդ) ելույթի մասին, գիտեք, որ Ֆրանսիան վճռական է տրամադրված, թույլ չի տա, որ իրեն վախեցնեն և միջազգային հանրության աջակցությամբ կշարունակի վճռականորեն պայքարել ահաբեկությունը հաղթահարելու համար», – ընդգծեց Շարպանտիեն։
Դեսպանը նաև իր երախտագիտությունը հայտնեց ՀՀ նախագահ Սերժ Սարգսյանին, ով այսօր եկել էր Ֆրանսիայի հրապարակ` ՀՀ ԱԳ նախարար Էդվարդ Նալբանդյանի, Երևանի քաղաքապետ Տարոն Մարգարյանի և պաշտոնատար այլ անձանց ուղեկցությամբ և իր զորակցությունն էր հայտնել Ֆրանսիային և ֆրանսիացիներին, ինչպես նաև հարգել էր այս սարսափելի ողբերգության զոհերի հիշատակը։
Նախօրեին ուշ երեկոյան Փարիզում և նրա արվարձաններից մեկում մի շարք ահաբեկություններ և կրակոցներ էին գրանցվել։ Վերջին տվյալներով` զոհվել է 128 մարդ, ավելի քան 300–ը գտնվում են հիվանդանոցներում, որոնցից 80–ը ծայրահեղ ծանր վիճակում են։
Ահաբեկիչները գրոհներ են կազմակերպել Փարիզի տարբեր կետերում։ Մեծ թվով զոհեր են գրանցվել «Բատակլան» համերգասրահում, որտեղ ահաբեկիչները պատանդ են վերցրել հանդիսատեսին։ Այնտեղ սպանվել է մոտ հարյուր մարդ։ Բացի այդ, մահապարտները պայթյուններ են կազմակերպել «Ստադ դե Ֆրանս» մարզադաշտի մոտակայքում։ Զինված գրոհայինները գնդակահարել են մի քանի սրճարանների և ռեստորանների այցելուների։
Ահաբեկությունների համար պատասխանատվությունը վերցրել է «Իսլամական պետություն» ահաբեկչական խմբավորումը։–0–
