ԱՄՆ–ում թուրք հյուպատոսին սպանած Համբիկ Սասունյանն ազատ է արձակվել և այցելել է Հայաստան

ԵՐԵՎԱՆ, 30 հոկտեմբերի./Նովոստի–Արմենիա/. Համբիկ Սասունյանը, ով ԱՄՆ–ում 1984թ.–ին դատապարտվել էր ցմահ ազատազրկման Լոս Անջելեսում Թուրքիայի գլխավոր հյուպատոս Քեմալ Արիքանին սպանելու համար, պայմանական–վաղաժամ ազատ է արձակվել և եկել է Հայաստան, գրում է asbarez.am–ը։

«Ամենայն ուրախությամբ գրում եմ ձեզ Հայաստանից։ Մոտավորապես 40 տարի անց պատիվ ունեմ լինել հայրենի հողի վրա, խմել հայրենի ջուրը, շնչելը օդը և զգալ ընտանեկան ջերմությունը», – նշել է Համբիկ Սասունյանը հայ ժողովրդին ուղղված իր ուղերձում։

Համբիկ Սասունյանը ծնվել է Լիբանանի մայրաքաղաք Բեյրութում 1963 թ.–ին։ Եղել է «Հայկական ցեղասպանության արդարության մարտիկներ» խմբի անդամ, արտագաղթել է ԱՄՆ։ 1984թ.–ին դատարանը վճիռ է կայացրել, որ 19–ամյա Համբիկը 1982թ.–ի հունվարի 28–ին առավոտյան Լոս Անջելեսում սպանել է թուրք դիվանագետ Քեմալ Արիքանին, երբ նա կանգնած է եղել լուսացույցի մոտ։

Կալանքից հետո ԱՄՆ դատարանը Սասունյանին դատապարտել է ցմահ ազատազրկման` առանց բողոքարկման իրավունքի։ Սասունյանն իր արարքը հիմնավորել է թուրքերի և թուրքական ռեժիմի նկատմամբ վրեժով 1915–ի Ցեղասպանության համար։ ԱՄՆ դատարանը 2006 և 2010թթ.–ին մերժել է Սասունյանի համաներման խնդրագիրը։

2019թ.–ի դեկտեմբերի 27–ին Կալիֆոռնիայի համաներման հանձնաժողովը բավարարել է Սասունյանի վաղաժամ ազատման միջնորդությունը, բայց նահանգապետ Գևին Նյուսոմը մերժել է այդ որոշումը։ 2021թ.–ի փետրվարի 24–ին Լոս Անջելեսի Գերագույն դատարանը չեղարկել է նահանգապետի որոշումը։ Նահանգապետը նշել է, որ այլևս չի բողոքարկի դատարանի վճռի դեմ։ 2021թ.–ի մարտին հրապարակվել է Սասունյանի վաղաժամ ազատման որոշումը։–0–