ԵՐԵՎԱՆ, 9 հոկտեմբերի. /Նովոստի–Արմենիա/. Ֆուտբոլի Հայաստանի հավաքականի գլխավոր մարզչի ժամանակավոր պաշտոնակատար Սարգիս Հովսեփյանը ֆրանսիացիների հետ հանդիպմանը իր սաների ջախջախիչ պարտությունը բացատրել է երկու թիմերի խաղի մակարդակի հսկայական տարբերությամբ։
Նախօրերին Նիսում անցկացված խաղն ավարտվել է 0։4 հաշվով։ Ֆրանսիական հավաքականի կազմում աչքի են ընկել Մադրիդի «Աթլետիկոյի» կիսապաշտպան Անտուան Գրիզմանը (35), «Քրիստալ Փելըսի» կիսապաշտպան Յոհան Կաբայը և Մադրիդի «Ռեալի» հարձակվող Քարիմ Բենզեման (78,79)։
«Այսպիսի հավաքականի դեմ խաղում, փորձում էինք եզրերով արագություն տալ, հակագրոհել: Մասամբ ստացվեց, պահեր կային, բայց վարպետությունը չհերիքեց: Իմ կարծիքով ինչ-որ չափով առաջին խաղակեսը ստացվեց, ինչ որ ուզում էի տեսնել ես տեսա»,– Հովսեփյանի խոսքն է մեջբերում Հայաստանի ֆուտբոլի ֆեդերացիայի մամուլի ծառայությունը։
Ըստ նրա` ամեն ինչ չստացվեց, որովհետև այդպիսի ուժեղ հավաքականի հետ խաղում կային թերություններ: «Եվ դա միայն մեր տղաների մեղքը չէր, այլ Ֆրանսիայի հավաքականի ֆուտբոլիստների որակը չափազանց բարձր էր, և մեր տղաները ուղղակի չէին հասցնում նրանց հետևից»,– ասաց Հովսեփյանը։
Նրա խոսքով, դա բնական է, որովետև Ֆրանսիայի հավաքականի ֆուտբոլիստները սովոր են բարձր մակարդակի հանդիպումներին, իսկ մենք ունենք ֆուտբոլիստներ, որոնք առաջին անգամ են մասնակցում նման հանդիպումների, իրենց համար մի փոքր անսովոր է այսպիսի բարձր որակը և արագությունները: Այս խաղում դաշտ դուրս եկան երիտասարդ ֆուտբոլիստներ, որոնց փորձարկում ենք ապագայի համար:
«Պարտության պատճառն ակնհայտ է: Թիմերի խաղամակարդակի տարբերությունը շատ մեծ էր, ես շնորհավորում եմ Ֆրանսիայի հավաքականին և ցանկանում հաջողություն Եվրոպայի առաջնության եզրափակիչ մրցաշարում»,– ասել է Հովսեփյանը։ -0-
