«Դեպորտիվո Արմենիո» արգենտինյան ակումբը կխաղա Հայոց ցեղասպանության 100–ամյա տարելիցին նվիրված մարզահագուստով. ԶԼՄ
ԵՐԵՎԱՆ, 17 ապրիլի. /Նովոստի–Արմենիա/. «Դեպորտիվո Արմենիո» արգենտինյան երրորդ դիվիզիոնի ակումբը կխաղա Հայոց ցեղասպանության 100–ամյա տարելիցին նվիրված մարզահագուստով, գրում է Sports.ru–ն։
Ֆուտբոլիստներն առաջիկա խաղերում դաշտ դուրս կգան սև մարզաշապիկներով, որոնց վրա գրված կլինի` «Հիշում եմ և պահանջում»։
2010 թվականին Հայոց ցեղասպանության 95–րդ տարելիցի առիթով խաղացողները դաշտ էին դուրս եկել Հայաստանի հավաքականի մարզահագուստով։
«Դեպորտիվո Արմենիո»–ն հիմնվել է 1962 թվականին Բուենոս Այրեսի արվարձանի հայկական համայնքի կողմից, ի սկզբանե կրել է Club Armenio de Fútbol (իսպ.` Հայաստան ֆուտբոլային ակումբ) անվանումը։ 1968 թվականին փոխել է անվանումը ներկայիս անվանումով և անդամակցել է Արգենտինայի ֆուտբոլի ասոցիացիային։ Թիմի գույները սկզբում սև–սպիտակ էին, այժմ հագուստը հայկական դրոշի օրինակով կարմիր–կապույտ–ծիրանագույն է, իսկ արտագնա խաղերի համար` սպիտակականաչ։ -0-
