ԵՐԵՎԱՆ, 27 մարտի. /Նովոստի–Արմենիա/. Երևանի «Արարատ» ակումբի և Հայաստանի հավաքականի նախկին ֆուտբոլիստ Խորեն Հովհաննիսյանը լավագույնն էր լավագույնների մեջ, ուրբաթ լրագրողներին ասաց խորհրդային ֆուտբոլիստ, ԽՍՀՄ վաստակավոր մարզիչ Անատոլի Բուշովեցը։ Նա եկել է Երևան Հովհաննիսյանի 60–ամյակին նվիրված հոբելյանական հանդիպմանը մասնակցելու համար։
Աշխարհի և ԽՍՀՄ–ի հավաքականների վետերան աստղերի ընկերական հանդիպումը տեղի կունենա Երևանի Հանրապետական մարզադաշտում մարտի 28–ին։ Այն նվիրված է հայկական ֆուտբոլի լեգենդ Խորեն Հովհաննիսյանի 60–ամյակին։
«Գտնվել և խաղալ Արարատ 73–ի կազմում, երբ քեզ շրջապատում են Անդրեասյանը, Մարկարովը, Զանազանյանը, Իշտոյանը և լինել լավագույններից լավագույնը։ Ի՞նչը կարող է ավելի լավ բնութագրել Հովհաննիսյանին, եթե ոչ խաղը։ Խաղալ ազգային հավաքականում և լինել լավագույններից լավագույնը պատիվ է բերում ցանկացած ֆուտբոլիստի», – ասաց Բուշովեցը։
Խորեն Հովհաննիսյանը հայկական ֆուտբոլի ամենաինքնատիպ ներկայացուցիչներից է։ Խաղացել է Երևանի «Արարատում» 1975-1985 թվականներին։ Աչքի է ընկել որպես խաղի հիանալի կազմակերպիչ, ով ունի զարմանալի տեխնիկա և առաջնորդի որակներ։ Գ. Ֆեդոտովի ակումբի անդամ է։ 35 խաղ է անցկացրել ԽՍՀՄ հավաքականում, 7 գնդակ է խփել։ 1980 թվականի Մոսկվայի Օլիմպիական խաղերի բրոնզե մրցանակակիր է։ 1976 թվականի Եվրոպայի երիտասարդական թիմերի չեմպիոն։ 1975 թվականի ԽՍՀՄ գավաթակիր, 1976 թվականի ԽՍՀՄ գարնանային առաջնության արծաթե մրցանակակիր։ 1982 թվականին մասնակցել է Իսպանիայի աշխարհի առաջնությանը` դառնալով Բելգիայի դարպաս ուղարկած գեղեցիկ գոլի հեղինակ։ -0-
