ՀՖՖ ղեկավարը դժգոհ է Շալանդի աշխատանքից, սակայն առայժմ չի պատրաստվում նրան ազատել պաշտոնից

ԵՐԵՎԱՆ, 18 նոյեմբերի. /Նովոստի–Արմենիա/. Հայաստանի ֆուտբոլի ֆեդերացիայի նախագահ Ռուբեն Հայրապետյանը դժգոհ է Հայաստանի հավաքականի գլխավոր մարզիչ Բեռնար Շալանդի աշխատանքից, սակայն շարունակում է հավատալ նրան։

«Բնականաբար ինձ, նախևառաջ, հետաքրքրում են արդյունքները, իսկ ես դրանցից դժգոհ եմ։ Ինձ ոչ մի կերպ չի կարող բավարարել այն իրավիճակը, երբ հավաքականը երեք խաղի ընթացքում ընդամենը մեկ միավոր է նվաճում»,– լրագրողներին ասաց Հայրապետյանը։

Նա շարունակում է հավատալ Շալանդին, սակայն շվեյցարացի մասնագետի մարտավարությունը ՀՖՖ–ի ղեկավարի սրտով չէ։

Պատասխանելով «Նովոստի–Արմենիա» գործակալության հարցին` պորտուգալացիների հետ խաղում Հայաստանի հավաքականի պարտության պատճառների մասին` Հայրապետյանը նշեց հայկական թիմի սխալ մարտավարությունն ու վատ խաղը։

«Դա իմ անձնական կարծիքն է։ Սարկիսովն ու Մարկոսը, ովքեր կատարյալ մարզավիճակում են, չպետք է նստեն պահուստայինների նստարանին։ Սակայն ես Հայաստանի ֆուտբոլի հավաքականի ղեկավարն եմ և պատասխանատու եմ մարզչի համար։ Մեծ հաճույքով կհանեի Շալանդին, բայց չկա այն կախարդական փայտիկը, որի օգնությամբ նոր մարզիչ գար և լուծեր բոլոր խնդիրները»,– նշեց Հայրապետյանը։

Ըստ նրա, չի կարելի շտապել որոշում ընդունելու հարցում, պետք է հնարավորություն տալ Շալանդին։

«Եթե անկեղծ լինեմ, ապա խաղից հետո չեմ շփվել նրա հետ, քանի որ շատ վրդովված էի։ Այժմ նա Իտալիայում է, որտեղ հետևելու է մեր մյուս հակառակորդի` Ալբանիայի հավաքականի խաղին (Ալբանիայի հավաքականն ընկերական խաղ է ունենալու իտալացիների հետ)։ Երբ վերադառնա, կխոսեմ նրա հետ։ Եթե ընդունի իմ նկատողությունները, ապա ես որոշում կկայացնեմ»,– ասաց Հայրապետյանը։

«Գուցե մենք ելք գտնենք, իսկ մարզչին միշտ էլ կարելի է հեռացնել պաշտոնից»,– ավելացրեց Հայրապետյանը։

Հայկական խումբը Եվրո-2016-ի ընտրական փուլի խմբում ուժերը կչափի Դանիայի, Պորտուգալիայի, Ալբանիայի և Սերբիայի հավաքականների հետ: Խմբում առաջատար է Դանիայի հավաքականը, որը չորս հանդիպումից հետո վաստակել է յոթ միավոր:Պորտուգալական թիմը երեք հանդիպումից հետո ունի 6 միավոր։ Երեք խաղից հետո չորս միավոր են վաստակել ալբանացիները։ Մրցաշարային աղյուսակը եզրափակում են Հայաստանի և Սերբիայի հավաքականները, որոնք երեք հանդիպումից հետո ունեն մեկական միավոր։ -0-