Վան Գալը կարծում է, որ Աշխարհի առաջնության կիսաեզրափակիչ փուլում ավելի լավ է պարտվել 1:7 հաշվով, քան` տուգանայիններով
ԵՐԵՎԱՆ, 10 հուլիսի. /Նովոստի-Արմենիա/. Նիդեռլանդների ֆուտբոլի հավաքականի գլխավոր մարզիչ Լուի վան Գալը հայտարարել է, որ կնախընտրեր աշխարհի առաջնության կիսաեզրափակիչ խաղում պարտվել 1:7 հաշվով, ինչպես դա եղավ Բրազիլիայի հավաքականի դեպքում, քան զիջել տուգանային հարվածաշարով, գրում է ՌԻԱ Նովոստին:
Նիդեռլանդների հավաքականը Երևանի ժամանակով չորեքշաբթի լույս հինգշաբթի գիշերը Բրազիլիայում անցկացվող աշխարհի առաջնության կիսաեզրափակիչ խաղում զիջել է Արգենտինայի հավաքականին 2:4 հաշվով տուգանային հարվածաշարերի արդյունքում: Սան Պաուլու քաղաքի «Արենա Կորինտիաս» մարզադաշտում կայացած հանդիպման հիմնական և լրացուցիչ ժամանակում հաշիվն այդպես էլ չբացվեց: Երրորդ տեղի համար կպայքարեն Նիդեռլանդների և Բրազիլիայի հավաքականները, վերջինս կիսաեզրափակչում 7:1 հաշվով ջախջախիչ պարտություն կրեց Գերմանիայի հավաքականի կողմից:
«1:7 հաշվով պարտվելն ավելի լավ է, քան տուգանային հարվածաշարով պարտվելը: Հիմա ես շատ տխուր եմ: Տուգանայիններով պարտվելը վատագույն տարբերակն է: Խաղով մենք գրեթե հավասար էինք, եթե չասեմ՝ ավելի ուժեղ Արգենտինայից», - հանդիպումից հետո կազմակերպված ասուլիսի ժամանակ ասել է վան Գալը:
«Այսօր մեզ հաջողվեց ստեղծել ընդամենը մի պահ, ինչը բավականին քիչ է, քան նախորդ հանդիպումներում: Նման վիճակ էր նաև Արգենտինայի մոտ: Թիմեր, որոնց կազմում հանդես էին գալիս Արիեն Ռոբենը, Ռոբին վան Պերսին և Լիոնել Մեսին, ստեղծեցին ընդամենը մեկական վտանգավոր պահ», - ավելացրել է նա:
Առաջնության քառորդ եզրափակչում Կոստա-Ռիկայի հավաքականի հետ տուգանային հարվածաշարերից առաջ վան Գալը հավաքականի հիմնական դարպասապահ Յասպեր Սիլեսենին փոխարինեց Թիմ Կռուլով, ով երկու հարված հետ մղեց և հաղթանակ բերեց «նարնջագույններին»:
«Եթե ես այսօր դարպասապահ փոխարինելու հնարավորություն ունենային, ապա դա կանեի: Սակայն այդ պահին ես օգտագործել էի փոխարինման բոլոր երեք հնարավորությունները: Ես փոխարինեցի Ինդի Մարտինեսին, քանի որ նա ընդմիջումից առաջ արդեն մեկ դեղին քարտ էր ստացել և միշտ չէ, որ հասցնում էր Էնդո Պերեսի հետևից: Նայջել Դե Յոնգին փոխարինեցի, քանի որ չէի ցանկանում ռիսկի տակ դնելու նրա առողջությունը: Վեն Պերսիին փոխարինեցի, քանի որ նա գրեթե ուժասպառ էր եղել», - բացատրել է վան Գալը:-0-
