Օլիմպիական լեռնային գյուղի բացման արարողությունն է տեղի ունեցել Սոչիում

ԵՐԵՎԱՆ, 30 հունվարի. /Նովոստի–Արմենիա/. Սոչիում տեղի է ունեցել Օլիմպիական լեռնային գյուղի, որտեղ ապրելու են Ձմեռային խաղերի մասնակիցները, բացման հանդիսավոր արարողությունը, հաղորդում է «ՌԻԱ Նովոստին»։, 

ՕԽ-2014-ի համար կառուցված Օլիմպիական երեք գյուղերը սկսել են աշխատել հինգշաբթի առավոտյան։ Երեք գյուղերից երկուսը գտնվում են լեռներում` հիմնականը և օժանդակը, որը գտնվում է «Լաուրա» դահուկա-բիաթլոնային համալիրի   հարևանությամբ։

Բացման հանդիսավոր արարողությանը մասնակցել են լեռնային օլիմպիական գյուղի ղեկավար Սվետլանա Ժուրովան, նրա տեղակալ Ալեքսեյ Նեմովը, ՌԴ սպորտի նախարար Վիտալի Մուտկոն, «Սոչի-2014»-ի կազմկոմիտեի նախագահ Դմիտրի Չեռնիշենկոն, ինչպես նաև Օլիմպիադայի մասնակից մարզիկները և կամավորները։ 

Հինգշաբթի ՕԽ-2014-ի մասնակիցները սկսել են օլիմպիական օբյեկտներում առաջին պաշտոնական մարզումները, լեռնային կլաստերում տեղի են ունեցել դահուկորդների և բիաթլոնիստների մարզումները։

ՄՕԿ–ը 2011թ.–ի սեպտեմբերին «ՌԻԱ Նովոստի» խմբին Օլիմպիադայի հատուկ լիազոր լրատվական գործակալության կարգավիճակ է շնորհել, որի կազմում ընդգրկված է «Р–Սպորտ» մարզական նորությունների գործակալությունը։ –0 -