Հայաստանի հավաքականի հանդիպման մրցավարին «թաղել են» Վիքիփեդիայում

Ազատ հանրագիտարանի՝ Վիքիփեդիայի էջը, որը պատմում է Իռլանդիա-Հայաստան հանդիպման իսպանացի մրցավար Իտուրալդո Գոնսալեսի մասին, խմբագրվել է, դրանում ավելացվել է նրա մահվան տարեթիվը:

Մասնավորապես Վիքիփեդիայի անգլիական վարկածում հայտնվել է «Էդուարդո Իտուրալդո Գոնսալես (ծնվել է 1967թ.-ի փետրվարի 20-ին Արանկուդիագայում, մահացել է 2011թ.-ի հոկտեմբերի 11-ին Դուբլինում (Իռլանդիա))» գրությունը:

Եվրո-2012-ի ընտրական փուլի շրջանակներում հոկտեմբերի 11-ին կայացած հանդիպման ժամանակ հայ ֆուտբոլիստներն արտագնա խաղում 2:1 հաշվով զիջեցին իռլանդացիներին և զրկվեցին Եվրո-2012-ի եզրափակիչ դուրս գալու համար պայքարը շարունակելուց:
Խաղի 26-րդ րոպեին Գոնսալեսը դաշտից հեռացրեց հայկական հավաքականի դարպասապահ Ռոման Բերեզովսկուն, քանի որ նա տուգանային հրապարակի սահմաններից դուրս իբր ձեռքով խաղաց: Սակայն կրկնապատկերի ժամանակ պարզ երևում էր, որ գնդակը դարպասապահի ձեռքին չի դիպել: Ավելին, գրոհի ժամանակ իռլանդացիների հարձակվող Սայմոն Քոքսը ձեռքով խաղաց: BBC-ին տված հարցազրույցում Քոքսը խոստովանեց, որ գնդակը դիպել է իր ձեռքին:

Էջի մեկ այլ գրության մեջ նշվում է, որ «անարդար Գոնսալեսը» Իռլանդիա-Հայաստան խաղը դատում էր Եվրո-2012 որակավորման շրջանակներում, և նրա սխալների պատճառով հայկական հավաքականը զրկվել է փլեյ-օֆի խաղերին մասնակցելու իրավունքից:
Նախագծի ադմինիստրացիան արդեն ջնջել է անցանկալի գրառումները:
Ինտերնետի հայ օգտատերերն առավել սուր են արձագանքել մրցավարի գործողություններին: Մրցավարի որոշումից վրդովված երկրպագուները Facebook-ում էջ են բացել:

Խմբերից մեկին՝ We hate Iturralde Gonzales-ին միացել է շուրջ երկու հազար օգտատեր, ովքեր բուռն քննարկման են ենթարկում մրցավարությունը՝ հիմնականում անպարկեշտ արտահայտություններ օգտագործելով: Տասնյակ ծաղրանկարներ,  խայթող նկարներ ու ֆոտոշոպով պատրաստված կոլաժներ են հայտնվել ցանցում: -0