Հայաստանի ֆուտբոլի հավաքականի գլխավոր մարզիչ Վարդան Մինասյանը որոշ առումով բեկումնային է համարում Եվրո-2012 ընտրական փուլի շրջանակներում Հայաստանի և Ռուսաստանի հավաքականների առաջիկա հանդիպումը, որը կկայանա մարտի 26-ին Երևանի Հանրապետական մարզադաշտում։
«Հնարավոր է՝ տվյալ փուլի համար այս խաղը բեկումնային է։ Մենք մոտենում ենք խաղին այն գիտակցմամբ, որ կարող ենք հաղթել։ Բայց կարևոր է հաղթել՝ միաժամանակ լավ խաղ ցուցադրելով»,- ասել է Մինասյանը «Սպորտ-Էքսպրես»-ին տված հարցազրույցում։
Հայկական հավաքականի մարզչի խոսքերով, այդ խաղը կարևորագույնը չէ իր մարզչական կարիերայում։ «Իմ մարզչական կարիերայում Ռուսաստանի հետ խաղը չէի առանձնացնի։ Ավելի շուտ կխոսեի այդ փուլի բոլոր խաղերի մասին, ընդհանուր արդյունքի, խաղի մասին»,- ասաց Մինասյանը։
Նրա խոսքով՝ հավաքականում կազմի կտրուկ երիտասարդացում է նկատվում՝ նախկինում այն երբեք այդքան փոփոխություններ չի կրել։
«Անշուշտ, այդ խաղի նշանակությունն էլ չեմ նվազեցնի։ Լավ կլիներ հաղթել, և դաշտ ենք մտնում հենց այդ նպատակով»,- նշեց ՄԻնասյանը։
Նա միաժամանակ ասել է, որ հայկական թիմի համար Ռուսաստանի հետ խաղն «աշխարհի վերջը չէ»։ «Մենք հանգիստ կընկալենք թե հաղթանակը, թե պարտությունը։ Կվերլուծենք և առաջ կշարժվենք»,- ասել է նա։
Հայաստանի ֆուտբոլի հավաքականը Եվրո-2012-ի ընտրական խմբում զբաղեցնում է երրորդ տեղը՝ առաջին անգամ ձեռք բերելով առաջնության եզրափակիչ դուրս գալու բոլոր հնարավորությունները: Երեքշաբթի Անդորրայի նկատմամբ հաղթանակ տանելուց հետո ֆուտբոլիստները չորս հանդիպումներում վաստակել են յոթ միավոր երկրորդ տեղը զբաղեցնող իռլանդացիների պես, սակայն իռլանդացիներն ավելի առաջ են, քանի որ հայերը 0:1 հաշվով պարտություն են կրել նրանցից:
Խմբում միանձնյա առաջատարի դիրքում են ռուսները, ովքեր վաստակել են ինը միավոր: 2010 թ.-ի հանդիպումների արդյունքներով յոթ միավորով չորրորդ տեղում է Սլովակիայի հավաքականը, որը ոչ-ոքի է խաղացել իռլանդացիների հետ, սակայն պարտվել է հայ ֆուտբոլիստների հետ խաղում:
Չորս միավորով հինգերորդ տեղում են մակեդոնացիները: Անդորրան, չվաստակելով ոչ մի միավոր, եզրափակում է մրցաշարային աղյուսակը:
Բացի այդ, Հայաստանի հավաքականը ձեռք է բերել խփած և բաց թողած գնդակների լավագույն ցուցանիշը՝ 9 խփած, 4 բաց թողած: Միաժամանակ հայ ֆուտբոլիստները խմբում բոլորից շատ գնդակներն են խփել:
Ռուս և հայ ֆուտբոլիստների պատասխան հանդիպումը տեղի կունենա Մոսկվայում հունիսի 4-ին:-0-
