ԵՐԵՎԱՆ, 27 մարտի. /Նովոստի-Արմենիա/. Վարշավայում մարտի 24-29-ը ընթացող «Ֆելիքս Շտամ» ավանդական միջազգային մրցաշարին մասնակից հայ 5 բռնցքամարտիկներից Ցոլակ Անանիկյանը, որ հանդես է գալիս 91 կգ քաշային կարգում, դուրս է եկել կիսաեզրափակիչ, ուրբաթ «Նովոստի-Արմենիա» գործակալությանը հայտնեցին ՀՀ բռնցքամարտի ֆեդերացիայի մամուլի ծառայությունից։
Ինչպես հայտնեցին «Նովոստի-Արմենիա» գործակալությանը, 2008թ-ի Եվրոպայի արծաթե մեդալակիր Անանիկյանն այսօր մենամարտելու է Լիտվացի բռնցքամարտիկի հետ, և պայքարն արդեն ընթանալու է ավանդական մրցաշարի արծաթե մեդալի համար:
Հայկական հավաքականի մեկ այլ ներկայացուցիչ՝ Վարշավա մեկնած 64 կգ քաշային կարգում հանդես եկող Հրաչիկ Ջավախյանը, 6:0 հաշվով հաղթանակ է գրանցել մրցաշարի առաջին օրը Սլովակիայի հավաքականի ներկայացուցչի հետ մենամարտում, սակայն, 2008թ-ի Օլիմպիական խաղերի բրոնզե մեդալակիր Ջավախյանը պարտվել է ռուս բռնցքամարտիկի հետ մենամարտում մեկ միավորի տարբերությամբ:
Մյուս երեք բռնցքամարտիկները՝ Ռոբերտ Եղիսյանը (57կգ), Արմեն Եփրեմյանը (75կգ) և Արա Պուլուզյանը (60 կգ) պարտություն են կրել մրցաշարում ունեցած իրենց հենց առաջին մենամարտում: Եփրեմյանն ու Պուլուզյանը պարտություն են գրանցել լեհ բռնցքամարտիկների հետ հանդիպումներում: Հավաքականի գլխավոր մարզիչ Ռաֆիկ Մեհրաբյանի կարծիքով, նշված երկու հանդիպումներում էլ մրցավարական կողմնակալ մոտեցում է ցուցաբերվել: -0-
