Հայաստանի հավաքականի մարզիչը չի պատրաստվում հրաժարական տալ ռումինացիներից պարտություն կրելուց հետո

ԵՐԵՎԱՆ, 9 հոկտեմբերի. /Նովոստի-Արմենիա/. Հայաստանի ֆուտբոլի հավաքականի մարզիչ Վարուժան Սուքիասյանը հայտարարեց, որ չի պատրաստվում հրաժարական տալ 2018 թ.-ի աշխարհի առաջնության ընտրական փուլում սեփական հարկի տակ ռումինացիներից 0:5 հաշվով պարտություն կրելուց հետո:

«Ես չեմ պատրաստվում հրաժարական տալ թիմի համար նման ծանր պահին, քանի որ դա տղամարդավարի չի լինի», - ասաց Սուքիասյանը հանդիպումից հետո կայացած մամուլի ասուլիսի ժամանակ:

Նա ավելացրեց, որ ինքնակամ նա իր պաշտոնը չի լքի, և կգնա միայն այն դեպքում, եթե դա պահանջի Ֆուտբոլի ֆեդերացիան:

Սուքիասյանն ընդգծեց, որ այս պահին նրա գլխավոր խնդիրն է հոգեբանորեն պատրաստել խաղացողներին հոկտեմբերի 11-ին կայանալիք լեհերի հետ ընտրական փուլի հանդիպմանը:

Նա ավելցրեց, որ թիմի վատ խաղը պայմանավորված էր խաղացողների բազմաթիվ վնասվածքներով, ինչպես նաև՝ խաղի 3-րդ րոպեին կիսապաշտպան Գոռ Մալաքյանի հեռացմամբ:

Ռումինացիների մարզիչ Քրիստոֆ Դաումն իր հերթին նշեց, որ Հայաստանի հավաքականն այդքան էլ վատ թիմ չէ և կարող է խմբին անակնկալի բերել: Նրա խոսքով, այս խմբում ֆավորիտներ չկան: «Կրկնվեմ, դանիացիների հետ խաղում դուք կարող էիք միավոր վաստակել», - ասաց Դաումը՝ ավելացնելով, որ շատ ուրախ է իր թիմի հաղթանակի կապակցությամբ:

 2018 թ.-ի Աշխարհի առաջնության ընտրական փուլում Հայաստանը հայտնվել է E խմբում՝ Ռումինիայի, Դանիայի, Լեհաստանի, Չեռնոգորիայի, Ղազախստանի հավաքականների հետ: Հայ ֆուտբոլիստները պարտվել են նաև սեպտեմբերի 4-ին կայացած դանիացիների հետ առաջին հանդիպմանը (0:1 հաշվով): -0-