Հայաստանի հավաքականի կիսապաշտպանը ուրախ է, որ տեղափոխվել է թուրքական «Բեշիքթաշ»

ԵՐԵՎԱՆ, 24 մայիսի. /Նովոստի-Արմենիա/. Հայաստանի հավաքականի կիսապաշտպան Արաս Օզբիլիզը, մեկնաբանելով «Ռայո Վալեկանոյում» անցկացրած ամիսները, հայտարարել է, որ ուրախ է թուրքական «Բեշիքթաշ» տեղափոխվելու կապակցությամբ:

«Ցավում եմ, որ չկարողացա ցուցադրել որակներս: Ավելի լավ կլիներ, եթե չմիանայի «Ռայո Վալեկանոյին»: Միգուցե, եթե չտեղափոխվեի այստեղ, կկարողանայի ավելի շատ բարելավել խաղային որակներս: Ամեն դեպքում, ես միշտ պատրաստ էի խաղադաշտ դուրս գալ», - ասել է Օզբիլիզը Milliyet թերթին, հաղորդում է armfootball.com-ը:

Նա նշել է, որ անհամբեր սպասում է «Բեշիքթաշի» կազմում նոր մրցաշրջանին: «Ուրախ եմ, որ չեմպիոն դարձած թիմի խաղացող եմ: Հիմա ես Հոլանդիայում եմ, կինս հղիության 9-րդ ամսում է: Շուտով կզգամ, թե ինչ է ծնող լինելու երջանկությունը», - ասել է Օզբիլիզը:

Նրա խոսքով, ինքը գիտի, որ ակումբի նախագահ Ֆիկրետ Օմրանն ու թիմի գլխավոր մարզիչ Շենոլ Գյունեշը մեծ հույսեր են կապում իր հետ: «Ամեն ինչ կանեմ դրանք արդարացնելու համար: Հաջորդ մրցաշրջանում կտեսնեք իսկական Արասին»,- Milliyet–ը մեջբերում է Օզբիլիզի խոսքերը:

Մոսկվայի «Սպարտակի» նախկին կիսապաշտպան Արաս Օզբիլիզն այս տարվա հունվարին 4,5 տարով պայմանագիր է ստորագրել թուրքական «Բեշիքթաշի» հետ, որը ֆուտբոլիստին միանգամից վարձավճարով տրամադրել էր իսպանական «Ռայո Վալեկանոյին»: Թուրքական ակումբը «Սպարտակին» 3 մլն եվրո է վճարել ֆուտբոլիստի տեղափոխման համար: -0-