Բուֆոնին դուր չի եկել Պելեի արարքը

ԵՐԵՎԱՆ, 8 հոկտեմբերի. /Նովոստի–Արմենիա/. Իտալիայի հավաքականի դարպասապահ Ջանլուիջի Բուֆոնը վստահ է, որ «սկուադրա աձուրայի» հարձակվող Գրացիանո Պելեն կվերադառնա հավաքական:

31-ամյա ֆուտբոլիստը հրաժարվել էր սեղմել թիմի գլխավոր մարզիչ Ջամպյերո Վենտուրայի ձեռքը, երբ փոխարինվել էրԱԱ-2018-ի որակավորման փուլի՝ Իսպանիայի հետ խաղի 60-րդ րոպեին:

Ֆուտբոլիստը ներողություն է խնդրել, բայց Վենտուրան որոշել է հեռացնել Պելեին Մակեդոնիայի հետ խաղի հայտացուցակից, գրում է armsport–ը։

«Պելեն գեղեցիկ չի վարվել: Մեր թիմի փիլիսոփայությունը հիմնված է միասնականության վրա, որը պետք է պահպանել նույնիսկ նյարդային վիճակում:

Ես վստահ եմ, որ Գրացիանոն ճիշտ հետևություններ կանի ու կվերադառնա հավաքական: 10 տարվա մեջ մեկ անգամ կարելի է սխալվել», - Բուֆոնի խոսքերը մեջբերել «ANSA»-ն:–0–