Թիմատին Երևանում 1000 բուրգեր կբաժանի և ելույթ կունենա հայ աստղերի հետ

ԵՐԵՎԱՆ, 17 հուլիսի. /Նովոստի-Արմենիա/. Հայտնի ռուսաստանցի ռեփեր Թիմատին կժամանի Երևան Black Star Burger ռեստորանի պաշտոնական բացմանը, որի ընթացքում անվճար 1000 բուրգեր կբաժանի և ելույթ կունենա հայ աստղերի հետ, «Նովոստի-Արմենիա» գործակալությանը հայտնեց ռեստորանի մարքեթինգի տնօրեն Յուրի Մինասյանը:

Black Star Burger Yerevan-ը գործում է Երևանում հունիսի 14-ից:

«Պաշտոնական միջոցառման շրջանակում նախատեսված է հայ աստղերի համերգը, ինչպես նաև հենց Թիմատիի ելույթը: Քանի երգ նա կներկայացնի, առայժմ հայտնի չէ, որովհետև դա ավելի շատ կախված է հանդիսատեսի և երկրպագուների տրամադրությունից: Սովորաբար այդպես է լինում ցանկացած աստղի մոտ` որքան ջերմ նրան դիմավորեն, այնքան ջերմ նա կպատասպանի», - ասաց Մինասյանը:

Նա պատմեց նաև, որ բացմանը ելույթ կունենան Իվետա Մուկուչյանը, Սրբուկը, պարային համար կլինի, ինչպես նաև բազմաթիվ հետաքրքիր ինտերակտիվ մրցույթներ:

«Գումարած` անվճար կբաժանվի 1000 բուրգեր: Դա մեզ մոտ ընդունված է` պաշտոնական բացումներին Թիմատին անձամբ պատրաստում և բաժանում է բուրգերներ բոլոր ներկաներին: Դե ոչ բոլորին, այլ 1000-ին, ում բախտն ինչպես բերի», - նշեց Մինասյանը:

Ռեստորանի պաշտոնական բացումը կկայանա հուլիսի 13-ին ժամը 19:00-ին Շահումյանի հրապարակում: -0-