ԵՐԵՎԱՆ, 5 սեպտեմբերի. /Նովոստի-Արմենիա/. Կիրովցի մերսող Նիկոլայ Եֆիմովը երկուշաբթի սկսել է հնգօրյա մարաթոնը, որի արդյունքում հավաքված ողջ գումարը հատկացվելու է գիշերօթիկ դպրոցների համար գրքեր և հագուստ գնելուն, ՌԻԱ Նովոստիին է հայտնել ակցիայի կազմակերպիչներից մեկը՝ Յանա Զիկինան։
«Ակցիան մեկնարկել է այսօր մոսկովյան ժամանակով 9.00-ին և կտևի 120 ժամ։ Այդ ընթացքում Նիկոլայը 120 հաճախորդներին առողջարար մերսում կանի։ Յուրաքանչյուր սեանսի տևողությունը 55 րոպե է։ Մի ժամվա ընթացքում 5 րոպե է տրվում մերսողին՝ խմելու կամ պետքարան գնալու համար։ Ողջ հավաքված գումարով (իսկ մեկ ժամվա մերսման սեանսի արժեքն է 600 ռուբլի), Կիրովի մարզի գիշերօթիկ դպրոցների համար գրքեր, գրասենյակային ապրանքներ և հագուստ կգնվի»,- պատմել է Զիկինան։
Ըստ նրա, Նիկոլայի նախկին ռեկորդը (2010թ.-ի հոկտեմբեր) կազմել է 72 ժամ անդադար մերսումը և գրանցվել է Ռուսաստանի ռեկորդների գրքում։
«Հինգ օրվա ընթացքում Եֆիմովը չի սնվելու, նախատեսված է ջուր, այդ թվում՝ հանքային ջուր, ցիտրուսային հյութ, մի փոքր շաքարավազ և աղ։ Մարաթոնի մեկնարկից առաջ Նիկոլայը մեկ ամիս շարունակ զբաղվել է առողջարար մարմնամարզությամբ, շնչառական վարժություններով, հատուկ սննդակարգով է սնվել։ Նա հաստատակամորեն մտադիր է գերազանցել իր նախորդ ռեկորդը»,- նշել է գործակալության զրուցակիցը։
Նա ավելացրել է, որ ակցիան շուրջօրյա հեռարձակվում է ինտերնետում։ 73-րդ ժամը լրանալուն պես ռեկորդի միջանկյալ ժամանակը կարձանագրի հատուկ հանձնաժողովը։ -0-
