Քաղավիացիան հայտնում է Միլան–Երևան–Միլան և Հռոմ–Երևան–Հռոմ չվերթերի իրականացման նոր ժամանակացույցը
![Քաղավիացիան հայտնում է Միլան–Երևան–Միլան և Հռոմ–Երևան–Հռոմ չվերթերի իրականացման նոր ժամանակացույցը Քաղավիացիան հայտնում է Միլան–Երևան–Միլան և Հռոմ–Երևան–Հռոմ չվերթերի իրականացման նոր ժամանակացույցը](/upload/iblock/853/uaehqurpaoi8an7qmkomeryicp8ih77k.jpg)
ԵՐԵՎԱՆ, 13 հունվարի․ /Նովստի-Արմենիա/․ Rynair ավիաընկերության կողմից հունվարի 14-ին գործարկվող Իտալիայից Հայաստան չվերթերը կհետաձգվեն գործադուլի պատճառով։
Իտալիայի Օդային երթևեկության կառավարման որոշ արհմիությունների կողմից հայտարարվել է սույն թվականի հունվարի 14-ին գործադուլ՝ չորս ժամ տևողությամբ, այս մասին հայտնում է ՀՀ Քաղաքացիական ավիացիայի մամուլի ծառայությունը։
Այն նախատեսվում է սկսել Իտալիայի տեղական ժամանակով ժամը 13:00-ից մինչև 17:00, որի ընթացքում մի շարք թռիչքներ չեղարկվելու են:
«Հաշվի առնելով այն փաստը, որ հունվարի 14-ին նախատեսվում է իրականացնել Ryanair ավիաընկերության առաջին թռիչքները դեպի Զվարթնոց օդանավակայան Իտալական Հռոմ և Միլան քաղաքներից, ուստի անհրաժեշտություն է առաջացել թռիչքները իրականացնել ուշացումներով, նախապես սահմանված չվացուցակի ապահովման անհնարինության պատճառով»,- ասվում է հաղորդագրության մեջ։
Համաձայն Ryanair ավիաընկերությունից ստացված տեղեկատվության՝
Միլան – Երևան FR4456 չվերթը Միլանի օդանավակայանից կմեկնի հունվարի 14-ին Միլանի ժամանակով ժամը 08:40-ին:
Երևան – Միլան FR4457 չվերթը Զվարթնոց օդանավակայանից կմեկնի հունվարի 14-ին տեղական ժամանակով ժամը 16:20-ին:
Հռոմ – Երևան FR4454 չվերթը Հռոմի օդանավակայանից կմեկնի հունվարի 14-ին Հռոմի ժամանակով ժամը 17:00-ին:
Երևան – Հռոմ FR4455 չվերթը Զվարթնոց օդանավակայանից կմեկնի հունվարի 15-ին տեղական ժամանակով ժամը 00:20-ին:
«Ուղեւորներին հորդորում ենք հետեւել Ryanair-ի կողմից ստացվող հաղորդագրություններին»,- նշվում է կոմիտեի հաղորդագրության մեջ։
Ինչպես այսօր հայտնել է ՀՀ քաղավիացիայի կոմիտեի նախագահ Տաթևիկ Ռևազյանը, Իտալիայի ավիացիոն ոլորտի աշխատակիցների գործադուլը կարող է հանգեցնել խափանումների Ryanair–ի աշխատանքում։-0-