ՀՀ ժուռնալիստների միությունը դատապարտում է «Nouvelles d'Arménie» ամսագրի խմբագրության վրա հարձակումը

ԵՐԵՎԱՆ, 21 հոկտեմբերի./Նովոստի–Արմենիա/. Հայաստանի ժուռնալիստների միությունը հայդես է եկել հայտարարությամբ` Ֆրանսիայում «Nouvelles d'Arménie» ամսագրի խմբագրության վրա հարձակման վերաբերյալ։

Միությունը խստագույնս դատապարտել է հարձակումը խմբագրության վրա, նշելով, որ դա ամսագրի դեմ հարձակման առաջին դեպքը չէ, և, ինչպես հավաստում են ամսագրի աշխատակիցները, նախորդ դեպքերից որևէ մեկը, ցավոք, չի բացահայտվել:

Հեղինակներն ընդգծում են, որ «Nouvelles d'Arménie»–ն տարիներ շարունակ զբաղվել է համահայկական կարևորության խնդիրների բարձրաձայնմամբ, մասնավորապես, Հայոց ցեղասպանության ժխտման դատապարտմամբ, Արցախի Հանրապետությանն իր աջակցությամբ:
  
«Ազատ խոսքի հանդեպ ցանկացած բռնություն կամ ճնշում մեծագույն խնդիր է ժողովրդավարական ցանկացած պետության համար: Հայկական ամսագրի խմբագրակազմի ներկայացուցիչները հարձակումը կապում են գլխավոր խմբագիր, ֆրանսահայերի համակարգող խորհրդի (CCAF) համանախագահ Արա Թորանյանի՝ Փարիզում անցկացվող հակաթուրքական ակցիաներին մասնակցելու ու Սիրիայի քրդերին աջակցություն հայտնելու հետ, և սա տագնապալի ազդանշան է»,– ասվում է Ժուռնալիստների միության հայտարարության մեջ։

Միության ներկայացուցիչները կոչ են անուն բոլորին խստորեն դատապարտել մամուլի հանդեպ հաճախացած հարձակումները, հատկապես պայմանավորված քաղաքական իրողություններով։

Հիշեցնենք, որ անհայտ անձինք հոկտեմբերի 19–ի լույս 20–ի գիշերը հարձակվել են Ֆրանսիայում գործող Nouvelles d'Arménie հայկական խմբագրության վրա։

Վնասվել են համակարգիչներն` ամսագրի նոր համարի նախատիպով։–0–