Հայտնի համաճարակաբան Վլադիմիր Դավիդյանցը մահացել է կորոնավիրուսից

ԵՐԵՎԱՆ, 30 հոկտեմբերի./Նովոստի-Արմենիա/. Այսօր հայտնի է դարձել, որ կորոնավիրուսից մահացել է համաճարակաբան, կենսաբանական գիտությունների դոկտոր, պրոֆեսոր, Առողջապահության ազգային ինստիտուտի համաճարակաբանության ամբիոնի վարիչ Վլադիմիր Դավիդյանցը, հաղորդում է ՀՀ ԱՆ մամուլի ծառայությունը:

ՀՀ առողջապահության նախարար Արսեն Թորոսյանը ցավակցական խոսք է հղել Վլադիմիր Դավիդյանցի մահվան կապակցությամբ:

«Ցավով, տեղեկացանք, որ կորոնավիրուսային հիվանդությունը խլել է համաճարակաբան, կենսաբանական գիտությունների դոկտոր, պրոֆեսոր, Առողջապահության ազգային ինստիտուտի համաճարակաբանության ամբիոնի վարիչ Վլադիմիր Դավիդյանցի կյանքը:

Իմ և առողջապահության նախարարության ողջ անձնակազմի անունից խորին ափսոսանք եմ հայտնում մեծանուն գիտնականի կորստի կապակցությամբ: Ցավակցում եմ պարոն Դավիդյանցի ընտանիքի անդամներին, հարազատներին, ընկերներին»,- նշել է նախարարը:

Դավիդյանցի ջանքերով և գիտական ​​աշխատանքներով Հայաստանում իրականացվել են աղի յոդացման, ինչպես նաև պոլիոմիելիտի և մալարիայի վերացման ծրագրեր: Նա եղել է բազմաթիվ ծրագրերի (ԱՀԿ, ԱՄՆ և Կանադայի միջազգային զարգացման գործակալությունների, ԵՄ, Հիվանդությունների վերահսկման և կանխարգելման ԱՄՆ կենտրոնի և այլն) ղեկավար և փորձագետ: Դավիդյանցի ղեկավարությամբ գրվել, մշակվել և հրատարակվել են բազմաթիվ գիտական ​​աշխատություններ, մասնագիտական ​​կրթական նյութեր, գրքեր, որոնք արդյունավետորեն ներդրվել են Հայաստանի գիտակրթական համակարգ` նպաստելով երկրի առողջապահական համակարգի զարգացմանը: Նա հեղինակ է ավելի քան 300 գիտական ​​աշխատանքների, այդ թվում ՝ մենագրությունների, ձեռնարկների և ատլասների:

Հայաստանում հոկտեմբերի 30-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 87432 դեպք, որոնցից 54316-ն` առողջացած, 1300-ը` մահվան ելքով:-0-