ԵՐԵՎԱՆ, 29 ապրիլի. /Նովոստի-Արմենիա/. Բելգիայի կառավարությունը որոշում է ընդունել երկրի բնակիչներին բաժանել յոդի բարձր պարունակությամբ հաբեր, որոնք անհրաժեշտ են ռադիացիայից պաշտպանվելու համար, հաղորդում է
BBC-ի ռուսական ծառայությունը:
Ինչպես հաղորդել է առողջապահության նախարար Մեգի դե Բլոկը, մինչ այդ ռադիացիայի դեմ հաբերի կանխարգելիչ բաժանման գոտին գտնվում էր ԱԷԿ-ից 20 կմ շառավղով հեռավորության վրա: Այժմ այդ տարածությունը մեծացել է մինչև 100 կմ:
Հաշվի առնելով ԱԷԿ-ի դիրքը երկրում, հնարավոր վտանգավոր գոտում է հայտնվել ողջ բնակչությունը: Ենթադրվում է, որ այս միջոցառումն ուժի մեջ կմտնի մյուս տարվա սկզբից:
Բերգիական կառավարության որոշումն ընդունվել է ճապոնական Ֆուկուսիմա ԱԷԿ-ի շուրջ իրավիճակի քննարկման ընթացքում, որտեղ 2011 թ.-ի երկրաշարժի հետևանքով վթար էր տեղի ունեցել:
Ընդհանուր առմամբ Բելգիայում աշխատում են երկու ԱԷԿ-երի յոթ միջուկային ռեակտորներ` հյուսիսային Դուլ քաղաքում և երկրի հարավում գտնվող Տիանժում, ևս մեկ ռեակտոր գործում է Մոլ քաղաքի միջուկային հետազոտությունների կենտրոնում:
Ավելի վաղ հարևան Հոլանդիան, Լյուքսեմբուրգը և Գերմանիան դիմել են Բրյուսելին` պահանջելով դադարեցնել այն միջուկային ռեակտորների աշխատանքը, որոնցում աշխատանքի խափանումներ են գրանցվել։
Մասնավորապես, Գերմանիայի շրջակա միջավայրի նախարար Բարբարա Հենդրիքսը կոչ է արել Բելգիային ժամանակավորապես դադարեցնել Դուլի ԱԷԿ-ի ռեակտորներից մեկը և Տիանժ էներգաբլոկը, մինչև որ դրանց անվտանգության ապացույցներ ներկայացվեն։
Բրյուսելը հրաժարվել է:
Ինչպես հիշեցնում է BBC թղթակիցը, այդ ԱԷԿ-երի աշխատանքը դադարեցվել է 2012 թ.-ին, երբ ռեակտորների պատերում ճեղքեր էին հայտնաբերվել։
Բելգիայի «Կանաչների կուսակցության» ղեկավար Ժան-Մարկ Նոլեն իր աջակցությունն է հայտնել բնակչությանը հաբերի բաժանման` երկրի կառավարության նախաձեռնությանը, սակայն նշել է, որ դա բավարար չէ ռադիացիայի հնարավոր հետևանքներից մարդկանց պաշտպանելու համար:
Ինչպես նշում է առողջապահության հարցերով BBC թղթակից Ջեյմս Գալահերը, յոդի պարունակությամբ համերը կոչված են պաշտպանել վահանագեղձը, որը տուժում է շրջակա միջավայրը ռադիոնուկլիդներով աղտոտման դեպքում: -0-
