ԵՐԵՎԱՆ, 12 մայիսի./Նովոստի–Արմենիա/. Նախօրեին Կազանի թիվ 175 դպրոցում տեղի ունեցած հարձակման հետևանքով բացի 7 աշակերտներից մահացել է նաև երկու մանկավարժ, որոնք 26 և 55 տարեկան էի։
Հարձակման հետևանքով մահացել է անգլերեն ուսուցչուհի 26–ամյա Էլվիրա Իգնատևան և տարրական դասարանների ուսուցչուհի 55–ամյա Վեներա Այզատովան։
Ինչպես հաղորդում է www.topnews.ru–ն, հղում անելով ՆՏՎ–ին, պարզվել է, որ 26–ամյա Էլվիրան հարձակման պահին դասի է եղել, լսվել է աղմուկ և կրակոցներ, Էլվիրան դուրս է եկել միջանցք և հայտնվել հարձակումը կազմակերպած Իլնազ Գալյավիևի ճանապարհին։ Այնտեղ է եղել նաև մեկ այլ ուսուցչուհի։
Իգնատևան ակնթարթորեն մի կողմ է հրել երեխաներից մեկին` փաստորեն փակելով նրան իր մարմնով, ու ստացել է մահացու վիրավորում։
Նշվում է, որ Էլվիրան դպրոցում աշխատում էր 2018թ.–ից, ինստիտուտն ավարտելուց հետո անմիջապես ընդունվել է դպրոց։ Նույն թվականին էլ այդ դպրոցն ավարտել է Գալյավիևը։
2018թ.–ին Իգնատևան դարձել է «Մեր նոր ուսուցիչ.2018» դրամաշնորհի հաղթող, ինչպես նաև զբաղեցրել է երկրորդ տեղը «Տարվա մանկավարժ» մրցույթում։
Ինչպես երևում է Էլվիրայի սոցցանցերի հրապարակումներից, նա շատ կենսուրախ և կենսասեր մարդ էր, տեսնում էր ուրախություն և երջանկություն անգամ մանրուքներում։ Միշտ կոչ էր անում կյանքում գնահատել ամեն ակնթարթ` լինի դա հաջողություն, թե անհաջողություն։
«Կզարմանաս, թե ինչ հեշտ է արթնանալ, երբ դու երջանիկ ես», – գրել է Էլվիրան։
Բազմաթիվ օգտատերեր ցավակցություն են հայտնում Էլվիրայի «կենդանի» հրապարակումների տակ։
«Հանգչիր խաղաղությամբ, գեղեցկուհի», «Ինչ ջերմ էջ է, ինչ հաճելի աղջիկ է և ինչպիսի տխուր ճակատագիր», – գրում են բաժանորդները։
Ինչպես հաղորդել էինք ավելի վաղ, մայիսի 11–ի առավոտյան 19–ամյա Իլնազ Գալյավիևը եկել է դպրոց ու կրակ բացել, նրան հաջողվել է ձերբակալել։ Հարցաքննության ժամանակ Իլնազը հայտարարել է, որ «ծնվել է` որպես աստված» և միշտ բոլորին ատել է։–0–
