ԵՐԵՎԱՆ, 1 հունվարի. /Նովոստի–Արմենիա/. Թեթև ուտեստները կօգնեն ոչ միայն ազատվել քաղցի զգացումից, այլև վերահսկել սեփական քաշը։ 

Ներկայացնում ենք վեց մթերք, որոնք օգնում են այրել ճարպը, գրում է kp.ru–ն։

1. Թարմ կաղամբ



Թարմ կաղամբը հարուստ է А և С վիտամիններով, կալիումով, կալցիումով, ֆոսֆորով, յոդով և այլ հանքանյութերով։ Կաղամբի կանոնավոր օգտագործումը նպաստում է իմունիտետի, անոթների ամրապնդմանը, լավացնում է շնչառական, ոսկրային, մարսողական համակարգերի աշխատանքը։ Կաղամբն այնպիսի մթերք է, որը մարսելու համար օրգանիզմը մեծ քանակությամբ էներգիա է ծախսում։ 

2. Հավի արգանակ լապշայով



«Մարդիկ, ովքեր հիմնական ուտեստից առաջ ուտում են արգանակ կամ թեթև բանջարեղենային ապուր, արդյունքում ավելի քիչ կալորիա են կլանում։ Ապուրում ավելացված արգանակը ստեղծում է հագեցածության զգացում, այնպես որ դուք չեք ցանկանա չափից շատ ուտել», – գրում է դիետոլոգ Ռանիա Բատայնեն, ով «Դիետա 1:1:1» գրքի հեղինակն է։ Փենսիլվանիայի համալսարանում իրականացված ուսումնասիրությունը ցույց է տալիս, որ այն մարդիկ, ովքեր ուտելուց առաջ արգանակ են խմում, 20%–ով նվազեցնում են օրական կալորիաների օգտագործման մակարդակը։ Բացի այդ, հավի ապուրը սպիտակուցի, ճարպաթթուների, В վիտամինի, երկաթի, կալցիումի, պղնձի, մագնիումի, սելենի հիանալի աղբյուր է։ Հավի արգանակն ակտիվորեն մասնակցում է նյութափոխանակության կարգավորման գործընթացին, օգնում է կարգավորել նյարդային համակարգի գործունեությունը։ 

3. Սուրճ



Աշխարհում ամենատարածված ըմպելիքներից մեկը` սուրճը, պարունակում է հակաօքսիդանտներ և քլորոգեն թթուներ, որոնք նվազեցնում են արյան մեջ գլյուկոզայի մակարդակը, արտադրում են ավելի շատ ստամոքսահյութ, վերահսկում են մարսողության գործընթացը։ Քվինսլենդում գիտնականներն անցկացրել են գիտափորձ, որի մասնակիցները բաժանվել են երեք խմբի։ Առաջինը նախաճաշից առաջ խմել է մեկ բաժակ սովորական աղացած սուրճ, երկրորդը` առանց կոֆեինի սուրճ, երրորդը` կոֆեինի դեղահաբ է ընդունել։ Կամավորները տառապել են չափից մեծ ախորժակով, հակված են եղել չափից շատ ուտելուն։ Որոշ ժամանակ անց գիտափորձի արդյունքները ցույց են տվել, որ առաջին խմբի մոտ նկատվել է ախորժակի նվազում, իսկ դա ապացուցում է, որ այստեղ կարևոր է ոչ միայն կոֆեինը, այլ նաև հատուկ ֆերմենտները, որոնք առկա են սուրճի բնական հատիկներում։ 

4. Գազար և բանջարեղենի այլ տեսակներ



Դդմի, բրոկոլիի, բողկի, բուլղարական պղպեղի, կանաչ ոլոռի, գազարի, նեխուրի, սպանախի և կաղամբի ամենօրյա օգտագործումը լավացնում է աղեստամոքսային տրակտի աշխատանքը։ Թվարկած բոլոր մթերքները հարուստ են բջջանյութով։ Բանջարեղենի այս տեսակները դրական են ազդում նաև նյութափոխանակության վրա և մաքրում են օրգանիզմը վնասակար նյութերից։ Բանջարեղենի այս տեսակների շնորհիվ դուք այլևս չեք զգա քաղց։ 

5. Ցիտրուսայիններ. թուրինջ, նարինջ, մանդարին



Ցիտրուսայինները վերահսկում են ինսուլինի մակարդակը օրգանիզմում։ Ուսումնասիրություններն ապացուցել են, որ թուրինջն ունի ճարպ այրող հատկություն, այն նաև ակտիվացնում է լյարդի աշխատանքը։ Ցիտրուսայինները մաքրում են օրգանիզմը թունավոր նյութերից և ամրապնդում են իմունիտետը։ 

6. Ձիթապտուղ և ձիթապտղի ձեթ



Օրական ուտելով ընդամենը 12 ձիթապտուղ` դուք կկարողանաք վերահսկել ձեր քաշը։ Ձիթապտուղը վիտամինների, սպիտակուցի հիանալի աղբյուր է, այն լավացնում է ստամոքսի և ենթաստամոքսային գեղձի աշխատանքը։ Ուտելով մի քանի ձիթապտուղ կամ խմելով մեկ գդալ ձիթապտղի ձեթ` դուք կկարողանաք մաքրել աղիներն ու կարգավորել աղի և ճարպերի յուրացման գործընթացը։–0–