ԵՐԵՎԱՆ, 14 հունիսի./Նովոստի–Արմենիա/. Նախաճաշը սննդի ամենակարևոր ընդունումներից է։ Այն կօգնի լիցքավորվել և կդառնա արդյունավետ օրվա սկիզբ։ Բայց հագեցնող նախաճաշի դեպքում անգամ չի կարելի սահմանափակվել միայն դրանով։ Ինչու՞ է դա վտանգավոր և ի՞նչ կլինի մի քանի օր միայն նախաճաշ ուտելու դեպքում, պարզաբանում է championat.com–ը սննդաբան Միլա Միկիտյուկի հետ։
Նախաճաշն, իհարկե, շատ կարևոր է։ Սակայն ոչ պակաս կարևոր է նաև ճաշը։ Եթե դուք ոչ բավարար քանակությամբ բարդ ածխաջրեր եք ստացել կամ օրգանիզմն էներգիայի կարիք ունի, ապա երեկոյան չեք դիմանա ու կսկսեք ամեն ինչ ուտել կրկնակի։ Դա կարող է հանգեցնել ստամոքսում ծանրության առաջացման ու բացասաբար ազդել քնի վրա։
Ցանկալի է բաց չթողնել սննդի ոչ մի ընդունում, չէ՞ որ օրգանիզմը չի ստանա բավարար քանակի սննդարար նյութեր։
Սննդաբանը խորհուրդ է տալիս ուտել օրը երեք անգամ։ Սակայն կան մարդիկ, որոնց համար ավելի հարմար է ամենօրյա մենյուն բաշխել 5 կամ 6 մասերի։ Փորձագետը կարծում է, որ այս հարցում ամեն ինչ անհատական է։ Օրինակ, շաքարային դիաբետ ունեցող մարդիկ պետք է ուտեն օրական երեք անգամ։
Պարտադիր է լրացնել օրական անհրաժեշտ բոլոր կալորիաները։ Կալորիաների դեֆիցիտը հանգեցնում է սթրեսի, և օրգանիզմն անցնում է «էներգիայի պահպանման» ռեժիմի, նյութափոխանակությունը դանդաղում է։
Նիհարելու փոխարեն օրգանիզմը սննդանյութերը կուտակում է «ճարպային ծուղակների» տեսքով։ Խնդիրներ չունենալու համար հետևեք այսպիսի սննդակարգի. նախաճաշը պետք է կազմի կալորիաների օրական նորմայի 20-25%–ը, ճաշը` 35-40%–ը, ընթրիքը`15-20%–ը, մնացածը թողեք սննդի կարճ ընդունումներին։
Սննդաբանը կարծում է, որ անհնար է մի քանի օր ուտել միայն նախաճաշ։ Օրգանիզմը չի ստանա անհրաժեշտ քանակի սննդանյութեր (սպիտակուց, ճարպ և ածխաջրեր)։
Մի քանի օր շարունակ միայն նախաճաշ ուտելու դեպքում դուք ամբողջ օրը կունենաք քաղցի զգացում, մեծ սթրեսի կենթարկեք օրգանիզմը, և երբ սկսեք նորմալ սնվել, օրգանիզմը կսկսի կալորիաներ կուտակել` «որպես պաշար», կարող է տեղի ունենալ հորմոնալ խախտում, զարգանալ գաստրիտ կամ կխորանա արդեն գոյություն ունեցող հիվանդությունը։
Պետք չէ դիմել ռիսկի և փորձարկումներ անել։ Երբ օրգանիզմին տալիս ենք անհրաժեշտ ամեն ինչ, ստանում ենք համապատասխան արդյունք։ Մենք ունենում ենք շատ ուժ և էներգիա, լավ տրամադրություն և բավականաչափ մոտիվացիա, որպեսզի զբաղվենք սպորտով, ակտիվ աշխատենք և ձգտենք ավելի մեծ նպատակների։–0–
