Ցնցող բացահայտում. գիտնականները պարզել են մոտալուտ երկրաշարժի նախանշանները

ԵՐԵՎԱՆ, 4 հունվարի./Նովոստի–Արմենիա/. Ռուս գեոֆիզիկոսները հետազոտության միջոցով բացահայտել են, թե ինչպես կարելի է հասկանալ, որ հինգ օրից տեղի է ունենալու երկրաշարժ։ Հետազոտության մասին զեկույցը հրապարակվել է «Գիտությունների ակադեմիայի զեկույցներ» ամսագրում, հաղորդում է gazeta.ru–ն։ 

Գիտնականները պարզել են, որ երկրաշարժից 4–5 օր առաջ ներքին գրավիտացիոն ալիքների երկարությունը սկսում է ավելանալ։ Այն հասնում է առավելագույն ցուցանիշի երկրաշարժից երկու օր առաջ, ինչից հետո կտրուկ անկում է ապրում աղետից մեկ օր առաջ։ 

Այս օրինաչափությունը բացահայտելու համար գեոֆիզիկոսները վերլուծել են արբանյակային տվյալները, որոնք ստացվել են 2007թ.–ի հունվարի 8–ին Ղրղըզստանում, 2013թ.–ի հունվարի 28–ին Ղազախստանում և 2013թ.–ի մայիսի 26–ին Ուզբեկստանում գրանցված երկրաշարժերի ժամանակ։ Բոլոր երեք դեպքերում արձանագրվել է գրավիտացիոն ալիքների պարամետրերի փոփոխություն։

Նշվում է, որ այս բացահայտումը կարող է օգնել երկրաշարժի կանխատեսման կարճաժամկետ մեթոդների մշակման հարցում։–0–