Ուշադրություն, պարացետամոլ. ինչու՞ է այն վտանգավոր հղիների համար

ԵՐԵՎԱՆ, 5 հունվարի. /Նովոստի–Արմենիա/. Եթե դուք հղի եք և աղջիկ եք սպասում, ապա չարժե հղիության ընթացքում երկարատև ընդունել պարացետամոլ, զգուշացնում են Էդինբուրգի համալսարանի գիտնականները։ Բանն այն է, որ պարացետամոլը կարող է նվազեցնել դեռ չծնված աղջիկ երեխայի վերարտադրողական ունակությունը, և երբ նա մեծանա, կարող է բախվել անպտղության խնդրի հետ, գրում է mama-likes.ru–ն։

The Telegraph–ի հաղորդմամբ, ուսումնասիրելով հղի առնետների վրա պարացետամոլի ազդեցությունը` գիտնականները հաստատել են, որ ծնված էգ առնետների ձվաբջիջների քանակն ավելի քիչ է, քան այն առնետների էգ ձագերի մոտ, որոնք չեն ընդունել պարացետամոլ։ Ինչպես հայտնի է, ձվաբջիջները ձևավորվում են իգական սեռի պտղի մոտ դեռևս ներարգանդային ժամանակաշրջանում։ Նշվում է նաև, որ նվազել են մոր արգանդում պարացետամոլի ազդեցությանը ենթարկված էգերի ձվարանների չափն ու ընդհանրապես պտղաբերությունը։


Այս դեղամիջոցը բացասաբար է ազդում նաև արուների վրա։ Փոքր տարիքում նրանց մոտ հայտնաբերվել է շատ ավելի քիչ բջիջ, որոնցից հետագայում զարգանում են սպերմատոզոիդներ, սակայն ավելի հասուն տարիքում արուների պտղաբերությունը վերականգնվել է։ 

Գիտնականները կարծում են, որ այս բոլոր գործընթացները կարող են տեղի ունենալ նաև կանանց մոտ, քանի որ առնետների և մարդու վերարտադրողական համակարգերը շատ նման են։ Միաժամանակ գիտնականները նշում են, որ խոսքը պարացետամոլի երկարատև ընդունման մասին է։ Դեռևս բացահայտված չէ, թե պտղաբերության վրա ինչ ազդեցություն է ունենում պարացետամոլի կարճ ընդունումը։

Պարացետամոլը սովորաբար ընդունվում է որպես ջերմիջեցնող։ Մինչև հիմա կար կարծիք, թե այն անվտանգ է հղիների համար։ Սակայն ստացված նոր տվյալները հաստատում են, որ այս դեղամիջոցը հարկավոր է ընդունել միայն ծայրահեղ դեպքերում, նվազագույն չափաբաժնով և կարճ ժամանակահատվածում։ Հղիներին խորհուրդ է տրվում խուսափել ցանկացած դեղորայքի ընդունումից, հատկապես հղիության առաջին եռամսյակում։–0–