Սևանա լճում արդեն 22–րդ օրն է շարունակվում են կորած ձկնորսի որոնողական աշխատանքները

ԵՐԵՎԱՆ, 21 նոյեմբերի. /Նովոստի–Արմենիա/. Սևանա լճում արդեն 22–րդ օրն է շարունակվում են կորած երիտասարդ ձկնորսի որոնողական աշխատանքները։

Հոկտեմբերի 31–ին ՀՀ ԱԻՆ Փրկարար ծառայությունն ահազանգ էր ստացել, որ Գեղարքունիքի մարզի Նորատուս գյուղի մոտակա լճափից երկու քաղաքացիներ նավակով մտել են Սևանա լիճ ձկնորսության և չեն վերադարձել։ Կորած քաղաքացիները Նորատուս գյուղի բնակիչներ 24-ամյա Ամուր Կյուրեղյանը և 25-ամյա Արևշատ Առաքելյանն են:

Նոյեմբերի 9–ին փրկարարներին հաջողվել էր գտնել Արևշատ Առաքելյանի դին ափից մոտ 13 կմ հեռավորության վրա։

Երկրորդ ձկնորսի որոնողական աշխատանքները դեռ շարունակվում են։

Երկուշաբթի Արտակարգ իրավիճակների նախարարությունում կայացած հերթական ամենշաբաթյա խորհրդակցության ընթացքում Գեղարքունիքի ՄՓՎ պետ, փ/ծ գնդապետ Է. Գալստյանն իր զեկույցում անդրադարձել է հոկտեմբերի 31-ին Սևանա լճում անհետացած երիտասարդներից մեկի որոնողական աշխատանքներին:

ՄՓՎ պետի փոխանցմամբ՝ ամեն օր որոնողական աշխատանքներն ընդլայնվում են 500 մետրով, մոտորանավակներով փրկարարները շրջում են ափամերձ տարածքներում:

Նախարար Արմեն Երիցյանի հանձնարարությամբ՝ ջրափրկարարական գույքը համալրվել է ստորջրյա սկուտերով, որն աշխատում է մինչև 40 մ խորությամբ և կարող է 75 րոպե մնալ ջրում:

Սկուտերը հնարավորություն կտա ջրասուզակին արագ և առավել լայն շառավղով իրականացնել որոնողական աշխատանքները, ինչպես նաև խնայել ուժերը:

ՄՓՎ պետը նաև նշել է, որ խստորեն հետևում են նախարարի հանձնարարականին, ըստ որի` որոնողական աշխատանքերը չեն դադարի և կշարունակվեն այնքան, որքան եղանակային պայմանները թույլ կտան:–0–