ԵՐԵՎԱՆ, 2 դեկտեմբերի. /Նովոստի–Արմենիա/. Չինացի գիտնականները պարզել են, որ եվրոպեոիդ ռասայի ներկայացուցիչների մինչև մեկ երրոդն ունի որոշակի գեներ, որոնք դժվարացնում են ծխելուց հրաժարվելը։ Այդ մասին գրում է
lenta.ru–ն` հղում անելով Translational Psychiatry ամսագրում հրապարակած հոդվածին։
Չինացի գիտնական Մին Լին (Ming Li) և Չժեցզյանի համալսարանի նրա գործընկերներն ուսումնասիրել են մարդու ուղեղում սինթեզվող «հաճույքի նեյրոմեդիատոր» դոպամինի արտադրությունը կարգավորող ANKK1 գենը։ ANKK1–ի և մարդու` ծխելը թողնելու ընդունակությունների միջև կապը ստուգելու համար գիտնականներն անցկացրել են 23 ուսումնասիրությունների վերլուծություն։ Նշենք, որ այդ ուսումնասիրություններին մասնակցել է 11 հազար կամավոր։
Ընդհանուր առմամբ կապ հայտնաբերել չի հաջողվել, բայց եվրոպեոիդ ռասայի ներկայացուցիչների մասով արդյունքներն ավելի հետաքրքիր էին։ Նրանց գրեթե 70 տոկոսն ունի A2/A2 գենային տարբերակ, որի կրողները 22 տոկոսով ավելի հեշտ են հրաժարվում ծխախոտից, քան գենի` A1/A1 և A1/A2 մյուս տարբերակներ կրողները։
Վերջին երկու տարբերակներն ավելի վաղ արդեն կապել են ճարպակալման և թմրամոլության հետ, դրանք, հավանաբար, ինչ–որ կերպ ուժեղացնում են կախվածությունը վնասակար սովորություններից։
Այդ տարբերակների կրողներին անհրաժեշտ է ծխախոտից հրաժարվելու ավելի ագրեսիվ ռազմավարություն, պնդում է Լին։ Պարզ չէ նաև, թե ինչպես են ANKK1 գենի մյուս տարբերակներն ազդում այլ ռասաների ներկայացուցիչների վրա։
Ուսումնասիրությունները շարունակվում են։
