Ցամաքի մակերեսը Երկրի վրա մեծացել է

ԵՐԵՎԱՆ, 27 օգոստոսի. /Նովոստի-Արմենիա/. Վերջին 30 տարիների ընթացքում Երկրի մակերևույթի վրա զգալի փոփոխություններ են կատարվել:

Նիդեռլանդների Deltares ինստիտուտի գիտնականներն ուսումնասիրություն են անցկացրել՝ օգտագործելով արբանյակային լուսանկարներ, գրում է vokrugsveta.ru գիտահանրամատչելի կայքը: Արբանյակից արված լուսանկարների օգնությամբ նրանք կազմել են ինտերակտիվ քարտեզ, որը ցույց է տալիս մեր մոլորակի մակերևույթին կատարված փոփոխությունները:

Բաց կանաչ գույնով նշված են այն հատվածները, որտեղից անցած երեսուն տարիների ընթացքում հեռացել է ջուրը, իսկ բաց երկնագույնով ներկված է ջրային նոր մակերևույթը՝ անցյալում այդ տարածքում ցամաք է եղել:

Nature Climate Change ամսագրում հրապարակված ամփոփիչ հոդվածում ասվում է, որ ջուրն առավելագույն ակտիվություն է դրսևորել Թիբետյան լեռնաշխարհում, որտեղ սառցալեռների հալման հետևանքով նոր հսկա լճեր են գոյացել:

Արալյան ծովը, հակառակը, ամենամասշտաբային ցամաքման վառ օրինակ է:

Իսկ Հյուսիսային Ամերիկայում ջրի ամենաշոշափելի կորուստը գրանցվել է Միդ լճում՝ ԱՄՆ-ի ամենամեծ ջրամբարում: Դրա մակերևույթի մակերեսը, որը նախկինում հասնում էր 640 քկմ-ի, 30 տարվա ընթացքում նվազել է 222 քկմ-ով:

Վերլուծելով դինամիկան՝ գիտնականները եկել են եզրակացության, որ անթրոպոգեն գործոնը (օրինակ, ամբարտակների կառուցումը և տարածքների արհեսական ցամաքեցումը) ավելի մեծ ազդեցություն է ունենում, քան բնական գործընթացները:

Ընդհանուր առմամբ, երեք տասնամյակում ջրի տակ է անցել 115 000 քկմ ցամաք, իսկ 173 000 քկմ ջրային տարածք ցամաքի է վերածվել: Գիտական աշխատանքի հաջորդ փուլում գիտնականները կպարզեն համաշխարհային կլիմայի հետ այդ փոփոխությունների կապը: -0-