Հայաստանում 2015 թ.–ի աշնանը Հնագետների միջազգային գիտաժողով կանցկացվի

ԵՐԵՎԱՆ, 27 փետրվարի. /Նովոստի–Արմենիա/. Մեծամորի պեղումների 50–ամյակին նվիրված Հնագետների միջազգային գիտաժողով կանցկացվի 2015 թ.–ի աշնանը Հայաստանում, ուրբաթ լրագրողներին ասաց Պատմամշակութային արգելոց–թանգարանների և պատմական միջավայրի պահպանման ծառայության գիտական աշխատանքների գծով տնօրենի տեղակալ Աշոտ Փիլիփոսյանը։

Նրա խոսքերով` գիտաժողովին մասնակցելու և Հայաստանի տարածքում հետագա պեղումներ կազմակերպելու համար հրավիրվել են մասնագետներ Իտալիայից, Վրաստանից, Թուրքիայից, Լեհաստանից և ԱՄՆ–ից։

«Մեծամորի տարածքում պարբերաբար պեղումներ են անցկացվում...2013 թ.–ից, կնքված պայմանագրի հիման վրա, պեղումներն անցկացվում են Վարշավայի հնագիտական թանգարանի հետ համատեղ», – ասաց Փիլիփոսյանը։

Նրա խոսքերով` Լեհաստանի կողմից աջակցություն է ցուցաբերվում ոչ միայն պեղումներին լեհ մասնագետների մասնակցության գծով, այլ նաև ֆինանսական հարցերում։

Փիլիփոսյանի խոսքերով` պեղումների գործընթացին միացել են նաև սլովակ հնագետները, ովքեր սկսել են աշխատել 2013–2014 թթ.–ին։ «Եթե արշավախումբն ավելի մեծ լինի, քան նախորդ տարիներին, ապա դա թույլ կտա իրականացնել ավելի լուրջ և մասշտաբային աշխատանքներ», – նշեց Փիլիփոսյանը։

Նա նաև նշեց, որ Մեծամորում իրականացված պեղումները վկայում են այն մասին, որ հին ժամանակներից Մեծամորը գտնվել են առևտրային ճանապարհների խաչմերուկում, որոնք անցել են Արարատյան դաշտավայրով, իրար են կապել Մերձավոր Արևելքն ու Հյուսիսային Կովկասը։

Մեծամոր քաղաք–ամրոցում  իրականացրած պեղումները սկսվել են 60–ականներին և կարճ ընդմիջումներով շարունակվում են մինչև հիմա։ 2013 թ.–ին արշավախմբին միացել են Վարշավայի հնագիտական թանգարանի լեհ մասնագետները։

Մեծամորում մասնավորապես հայտնաբերվել են դամբարաններ, կերամիկայից պատրաստված իրեր, զարդեր, աշխատանքի գործիքներ և այլ նմուշներ, որոնք ապացուցում են, որ Մեծամորում առաջին հազարամյակի սկզբում քաղաքակային կյանք է եղել։

Մեծամոր քաղաք–ամրոցը գտնվում է Երևանից ոչ հեռու` Արարատյան դաշտավայրի կենտրոնում։ Ամրոցն զբաղեցրել է հրաբխային լեռան ողջ մակերեսն ու շրջակա միջավայրի մի մասը։ –0–