ԵՐԵՎԱՆ, 29 հունվարի. /Նովոստի–Արմենիա/. Հայաստանում հրատարակվել է հայագետ Արգամ Այվազյանի գիտական աշխատությունը, որը պատմում է վերջերս հայտնաբերված XVI դարի չորս ձեռագիր Ավետարանների և XVII-XVIII դարերի յոթ արծաթե սրբապատկերների մասին։
Ինչպես հինգշաբթի գրքի շնորհանդեսի ժամանակ նշեց Այվազյանը, հայտնաբերված արծաթե սրբապատկերները գտնվում են Հունաստանում, և դրանց մասին տեղեկություններն առաջին անգամ են հրապարակվում։
«Գրքում կա ավելի քան 600 նկարազարդում, որոնք թույլ են տալիս ընթերցողին պատկերացում կազմել գրքերի նկարազարդման արվեստի մասին, քանի որ հայ մասնագետները չեն կարող տեսնել սրբապատկերները», – հինգշաբթի լրագրողներին ասաց Այվազյանը։
Պատմաբանի խոսքերով` բոլոր գտածոները փրկվել են Հայոց ցեղասպանության տարիներին և ներառվել են Հունաստանում Գալֆայանների ընտանիքի հավաքածուում։
«Գալֆայանների ընտանիքի տասնյակ տարիներ շարունակ հավաքել է ջարդերից փրկված ընտանիքների կողմից տրամադրվող ձեռագրեր, գրքեր և տարբեր տեղեկություններ», – նշեց Այվազյանը։
Հեղինակն ընդգծեց, որ գիտական աշխատությունը պետք է լույս տեսներ հայկական գրատպության 500–ամյակի և 2012 թ.–ին ՅՈՒՆԵՍԿՕ–ի կողմից Երևանը Գրքի համաշխարհային մայրաքաղաք ճանաչելու կապակցությամբ, սակայն որոշ դժվարությունների պատճառով գիրքը հրատարակվեց 2014թ .–ի դեկտեմբերին։
Այվազյանի կողմից ներկայացված «Անատոլի Յակոբսոն. նամակներ» երկրորդ գրքում ներկայացված են Յակոբսոնին (1906 – 1984 թթ.) հասցեագրված նամակների տեքստերը, ով իր կյանքի մեծ մասը նվիրել է հայկական հուշարձանների, ճարտարապետության և քանդակագործության ուսումնասիրմանը։
Գիրքը հրատարակվել է ֆրանսերենով, անգլերենով, իտալերենով, ռուսերենով։
«Յակոբսոնը միշտ պնդում էր, որ Գանձասարը հայկական ճարտարապետության հանրագիտարանն է, չնայած որոշ ադրբեջանցի պատմաբաններ մինչ հիմա փորձում են հակառակն ապացուցել», – ասաց Այվազյանը։
Այվազյանի խոսքերով` նա բավականին սերտ շփում է ունեցել Յակոբսոնի հետ, նրանք համատեղ աշխատել են, ուսումնասիրել Նախիջևանի պատմությունը, ինչի մասին կարելի է կարդալ «Անատոլի Յակոբսոն. նամակներ» գրքում։–0–
