Ռոսկոսմոսը մինչև տարեվերջ կներկայացնի 2020թ.-ից հետո ՄՏԿ-ի ծրագրին մասնակցելու իր դիրքորոշումը

ԵՐԵՎԱՆ, 12 նոյեմբերի. /Նովոստի-Արմենիա/. Ռոսկոսմոսը Միջազգային տիեզերական կայանի ծրագրի մասնակից-երկրներին մինչև տարեվերջ կներկայացնի 2020թ.-ից հետո կայանի շահագործմանը մասնակցելու իր դիրքորոշումը, հաղորդում է ՌԻԱ Նովոստին՝ հղում անելով տիեզերական գերատեսչության ղեկավար Օլեգ Օստապենկոյին:

«Ամերիկյան կողմը մտադիր է շահագործել ՄՏԿ-ն նաև 2020թ.-ից հետո: Նրանք խոսում են մինչև 2024 թվականի մասին: Իսկ մենք տեղեկացրինք, որ սեփական կարծիքը կներկայացնենք առաջիկայում, ինչի մասին տեղյակ կպահենք նաև համագործակցության մնացած մասնակիցներին: Մենք համաձայնել ենք շահագործել ՄՏԿ-ն մինչև 2020թ.-ը: Իսկ այդ ժամկետից հետո մեր մասնակցության մասին վերջնական որոշումը կընդունվի մինչև տարեվերջ», - ասել է Օստապենկոն լրագրողներին Airshow China-2014 միջազգային ավիատիեզերական սալոնի ժամանակ:

Նրա խոսքով՝ ՄՏԿ-ի հեռանկարները վերջերս քննարկվել են Փարիզում՝ NASA-ի ադմինիստրատոր Չարլզ Բոլդենի, Եվրոպական տիեզերական գործակալության գլխավոր տնօրեն Ժան-Ժակ Դորդենի, Ֆրանսիայի ազգային տիեզերական գործակալության նախագահ Ժան-Իվ Լե Գալլի և Ճապոնական աերոտիեզերական գործակալության (JAXA) նախագահ Նաոկի Օկումուրայի հետ տեղի ունեցած երկկողմ բանակցությունների ժամանակ:

«Մենք շատ հարցեր ենք քննարկել, որոնք կապված են ՄՏԿ-ի հետագա շահագործման, փորձառական բաղադրիչի հետ և այլն: Մի քանի աշխատանքային խումբ ենք կազմել, որոնք իրականացնելու են այդ աշխատանքը: Մասնավորապես, ճապոնական կողմի հետ մենք որոշեցինք 2015թ.-ի փետրվար-մարտին խորհրդակցություն անցկացնել և պատրաստել աշխատանքի ծրագիրը: Հիմնական հարցերից մեկը ՄՏԿ-ն է», - նշել է Օստապենկոն:

ՄՏԿ-ի հետ կապված հարցը սրվեց մայիսին, երբ Ղրիմը միացավ ՌԴ-ին և դրա հետևանքով Մոսկվայի և Վաշինգտոնի հարաբերությունները լարվեցին: Այդ ժամանակ ԱՄՆ-ի սահմանած պատժամիջոցներին ի պատասխան՝ ՌԴ փոխվարչապետ Դմիտրի Ռոգոզինը հայտարարեց, որ Ռուսաստանը մտադիր չէ չորս տարով երկարացնել ՄՏԿ-ի շահագործումը, ինչն առաջարկում է ամերիկյան կողմը, և նախընտրում է փորձնական ծրագրի համար նախատեսված միջոցներն ուղղել ուրիշ հեռանկարային տիեզերական նախագծերի։

Փարիզում նոյեմբերի 4-ին տեղի է ունեցել առաջատար տիեզերական գործակալությունների ղեկավարների հանդիպումը, որոնք համագործակցում են ՄՏԿ-ի ծրագրով: Հանդիպման ընթացքում հաստատվել է մինչև 2020 թ.-ը կայանի աշխատանքի երկարացման մտադրությունը, ինչպես նաև սերտ համագործակցությունը շարունակելու պատրաստակամությունը:-0-