ԵՐԵՎԱՆ, 16 սեպտեմբերի. /Նովոստի-Արմենիա/. Օզոնային շերտի պահպանության միջազգային օրն է նշվում երեքշաբթի։
1994 թվականին ՄԱԿ Գերագույն ասամբլեան սեպտեմբերի 16-ը հռչակեց Օզոնային շերտի պահպանման միջազգային օր։ 1987 թ. այդ օրը ստորագրվեց Մոնռեալի` օզոնային շերտը քայքայող նյութերին վերաբերող արձանագրությունը, հաղորդում է «ՌԻԱ Նովոստին»։
Մթնոլորտային օզոնի կոնցենտրացիայի կտրուկ անկումը` «օզոնային խոռոչը» առաջին անգամ հայտնաբերվել է 1980-ականներին Անտարկտիդայի վրա։
Վերջերս 35 տարվա ընթացքում առաջին անգամ գիտնականներին հաջողվեց հաստատել, որ օզոնային շերտը, որը պաշտպանում է Երկիր մոլորակը ուլտրամանուշակագույն ճառագայթներից, սկսել է վերականգնվել: Շերտի ամբողջական վերականգնումը կարող է տևել մի քանի տասնամյակ, նշվում է չորեքշաբթի հրապարակված ՄԱԿ-ի շրջակա միջավայրի ծրագրի (UNEP) և Համաշխարհային օդերևութաբանական կազմակերպության (WMO) համատեղ հետազոտության մեջ:
Հետազոտության մեջ նշվում է, որ օզոնային շերտի դրական փոփոխությունները, մասնավորապես, տեղի են ունենում համաձայնեցված միջազգային գործողությունների շնորհիվ, որոնք ուղղված են օզոնը քայքայող նյութերի օգտագործման դեմ:
«Մենք դրական փոփոխություններ ենք նկատել, որոնք ցույց են տալիս, որ օզոնային շերտը կարող է ամբողջովին վերականգնվել հարյուրամյակի կեսերին: Մոնռեալի արձանագրությունը շրջակա միջավայրի հարցերին վերաբերող ամենահաջողված պայմանագրերից մեկն է, այն պաշտպանում է օզոնային շերտը և կանխարգելում է Երկրագնդի մակերևույթը ուլտրամանուշակագույն ճառագայթների բացասական ազդեցությունից», - հայտարարել է ՄԱԿ-ի գլխավոր քարտուղարի տեղակալ և UNEP-ի ղեկավար Ակիմ Սթեյները:
1987 թ.-ին ստորագրված Մոնռեալի արձանագրությունը, որը ուժի մեջ է մտել 1989 թ.-ի հունվարի 1-ին, այս պահին վավերացվել է ՄԱԿ-ի 196 պետությունների, այդ թվում նաև Հայաստանի կողմից: Փաստաթուղթը սկսած 2004 թ.-ից հիդրոքլորֆտորային ածխածնի կիրառման աստիճանական կրճատում է նախատեսում, որը քայքայում է օզոնային շերտը և արագացնում է գլոբալ տաքացման գործընթացը: Նախատեսվում է այն ամբողջովին վերացնել մինչև 2030 թ.-ը:-0-
