ԵՐԵՎԱՆ, 11 հուլիսի. /Նովոստի–Արմենիա/. Հայաստանն այս աշնանը կսկսի ռադիոակտիվ իզոտոպների արտադրություն ծանր հիվանդությունների ախտորոշման և բուժման համար, հայտնում է Միջուկային հետազոտությունների միավորված ինստիտուտի (ՄՀՄԻ) պաշտոնական պարբերական «Դուբնա. գիտություն, համագործակցություն, առաջընթաց» շաբաթաթերթը` հղում անելով ՄՀՄԻ–ում Հայաստանի լիազոր ներկայացուցիչ Սամվել Հարությունյանին։
«Մենք ցիկլոտրոն ենք ձեռք բերել (ռադիոակտիվ իզոտոպների սինթեզի համար)։ Նոյեմբերից այն կաշխատի, Հայաստանում կարտադրվեն միջուկային բժշկության ռադիոնուկլիդներ։ Մեր տարածաշրջանում Հայաստանը կդառնա երկիր, որը կարող է արտադրել, օգտագործել և վաճառել ռադիոնուկլիդներ։ Այս տարվանից սկսած` կենտրոնը կաշխատի ոչ միայն ռադիոնուկլիդների արտադրության համար, այնտեղ կանցկացվեն նաև հիմնարար հետազոտություններ»,– ասաց Հարությունյանը, ում խոսքը մեջբերում է պարբերականը, հայտնում է «ՌԻԱ Նովոստին»։
Նա նշեց, որ այդ ծրագրի գլխավոր գիտական խորհրդատուն է ՄՀՄԻ Ֆլյորովի անվան Միջուկային ռեակցիաների լաբորատորիայի գիտական ղեկավար, ակադեմիկոս Յուրի Հովհաննիսյանը։
Հանրապետությունում Երևանի Ֆիզիկայի ինստիտուտի բազայի վրա միջուկային բժշկության և ուռուցքային հիվանդությունների դեմ պայքարի կենտրոնի ստեղծման որոշումը Հայաստանի կառավարությունն ընդունել է 2009 թվականին։ Կենտրոնի կառավարիչ ընկերությունը Global Medical Solutions բելգիական ընկերությունն է։
Կենտրոնը բաղկացած կլինի բարձր տեխնոլոգիական երեք բաժիններից` ռադիոիզոտոպների սինթեզի համար ցիկլոտրոնով զինված լաբորատորիա, պոզիտրոնային–էմիսիոն տոմոգրաֆիայի ախտորոշիչ կենտրոն, որը թույլ կտա հայտնաբերել ուռուցքն օրգանիզմում զարգացման վաղ փուլում, կլինիկա, որտեղ կկատարվի բուժում ռադիոիզոտոպներով։ -0-
