«Բանբեր հայագիտության» հնգալեզու միջազգային գիտական հանդեսի առաջին համարի շնորհանդեսը կայացել է Հայաստանում

ԵՐԵՎԱՆ, 5 փետրվարի. /Նովոստի–Արմենիա/. ««Բանբեր հայագիտության» հնգալեզու միջազգային գիտական հանդեսի առաջին համարի շնորհանդեսը կայացել է Հայաստանի գիտությունների ազգային ակադեմիայում։

Պարբերականը, որում մի քանի լեզուներով հրապարակվում են հայ և օտարազգի հայագետների գիտական հոդվածները, լույս կտեսնի տարին երեք անգամ։ Ամսագրի օրինակները կփոխանցվեն Հայաստանի գրադարաններին և բուհերին, ինչպես նաև Հայաստանի սփյուռքի նախարարությանը` երկրի սահմաններից դուրս դրանք տարածելու համար։

«Վերջին տասնամյակի ընթացքում հայագիտական բոլոր գիտական հետազոտությունների միավորման սուր անհրաժեշտություն էր նկատվում։ Շատ կարևոր է համակարգել և միավորել մեր պատմությանը, մշակույթին, ազգի ծագումնաբանությանը, Ցեղասպանությանը վերաբերող հետազոտությունները»,– ասաց Գիտությունների ազգային ակադեմիայի նախագահ Ռադիկ Մարտիրոսյանը։

Նա նշեց նաև, որ գիտական պարբերականը կնպաստի ողջ աշխարհում սփռված հայագիտական կենտրոնների միջև միջազգային համագործակցության զարգացմանը։

Ամսագրի գլխավոր խմբագիր, պատմական գիտությունների դոկտոր Պավել Չոբանյանն իր հերթին նշեց, որ ամսագրի հրատարակման նպատակը հայագիտության զարգացմանն օժանդակելն է, ինչպես նաև տեղեկատվական տեխնոլոգիաների զարգացման համատեքստում գիտական հետազոտությունների անցկացմանն աջակցելը։

«Հոդվածները դիմագրավելու են Հայաստանի պատմության խեղաթյուրումներին ու շահարկումներին, քննարկելու է հայագիտության հետագա զարգացմանը խոչընդոտող գործոնների ու հանգամանքների հաղթահարման ուղիները»,– ընդգծեց պատմաբանը։

«Բանբեր հայագիտության» ամսագրի առաջին համարը հրատարակվել է 400 օրինակ տպաքանակով։

Ամսագիրը հրատարակվում է Հայագիտական հետազոտությունների համահայկական հիմնադրամի ֆինանսավորմամբ։ -0-