Հայտնի ռուս տիեզերագնաց Ալեքսանդր Բալանդինը կայցելի Հայաստան «Տիեզերական ոդիսական» ծրագրի շրջանակներում
Ռուսական պատվիրակությունը, որի կազմում են տիեզերագնաց օդաչու, Խորհրդային Միության Հերոս Ալեքսանդր Բալանդինը և «Սոյուզ» համառուսական երիտասարդական աէրոտիեզերական միության գործադիր տնօրեն Իվան Մուրավյովը, հունիսի 1-4-ը կայցելի Հայաստան «Տիեզերական ոդիսական» միջազգային կրթական ծրագրի շրջանակներում, հաղորդում է Ռոսսոտրուդնիչեստվոյի մամուլի ծառայությունը։
Հունիսի մեկին պատվիրակությունը կայցելի Վ. Համբարձումյանի անվան Բյուրականի աստղադիտարանը, հաջորդ օրը Ռուսական մշակութային և գիտական կենտրոնում կկայանա ռուսական պատվիրակության հանդիպումը Հայաստանում Ռոսսոտրուդնիչեստվոյի ներկայացուցչության անձնակազմի, Հանրակրթական դպրոցների ռուսաց լեզվի և գրականության ուսուցիչների հայկական ասոցիացիայի, ռուսական բուհերի շրջանավարտների միության ռուսաց լեզվի դասախոսների հայկական ասոցիացիայի ներկայացուցիչների հետ։
Նույն օրը «Մոսկվա» կինոթատրոնում կանցկացվի Յուրի Գագարինի՝ տիեզերք կատարած թռիչքի 50-ամյակին նվիրված ֆոտոցուցահանդեսի հանդիսավոր բացումը և տիեզերական թեմայով վավերագրական ֆիլմերի ցուցադրություն։
Բացի այդ, չորեքշաբթի Ալեքսանդր Բալանդինը և Ւվան Մուրավյովը մի շարք հանդիպումներ կունենան դպրոցականների և մանկավարժական անձնակազմի, Գագարին (Գեղարքունիքի մարզ) գյուղի բնակիչների հետ։
Հինգշաբթի ռուսական պատվիրակության պատվին հանդիպում կանցկացվի Հայաստանի Ազգային ժողովում։
Հանդիպում է ծրագրված նաև Երևանի պետական համալսարանի ուսանողական և դասախոսական կազմի հետ, ինչպես նաև նախատեսվում է այցելել Երևանի Մայակովսկու անվան դպրոց։ -0-
