Հայաստանի «Արենի 1» քարանձավային համալիրում բնական թանգարան կստեղծվի

Բնական թանգարան կստեղծվի Հայաստանի «Արենի 1» քարանձավային համալիրում, որտեղ հնագետների միջազգային խումբը հին կաշվե ոտնաման և վեց հազար տարի հնության եղինջի մանրաթելից պատրաստված հագուստ, ինչպես նաև գինեգործության արհեստի հին վկայություններ է հայտնաբերել, հայտնեց արշավախմբի հայկական մասի ղեկավար Բորիս Գասպարյանը:

«Արենի 1» քարանձավային համալիրի պեղումները մեկնարկել են 2007 թ.-ին: Բացառիկ միկրոկլիմայի շնորհիվ այս համալիրում պահպանվել են քարե դարին պատկանող օրգանական նյութեր՝ լաթի, բրդի և այլ նյութերի կտորներ, ինչը բացառիկ հնարավորություն է տալիս հնագույն տեխնոլոգիաների և մշակույթների ուսումնասիրման համար:
«Ապագա թանգարանի ստեղծման որոշակի աշխատանքներ են տարվում հետազոտական աշխատանքներին և պեղումներին զուգընթաց: Հետագայում հատուկ գիտական խորհուրդն արդեն կորոշի, թե համալիրի որ մասերը մենք պետք է պահածոյացնենք»,- ուրբաթ մամուլի ասուլիսի ժամանակ ասաց Գասպարյանը:

Ըստ գիտնականի, թանգարանի ստեղծումը մեծ նշանակություն կունենա այդ տարածաշրջանում (Վայոց Ձորի մարզ) զբոսաշրջության զարգացման համար, քանի որ նման ինքնատիպ համալիր աշխարհում գրեթե չկա:

ՀՀ գիտությունների ազգային ակադեմիայի հնագիտության և ազգագրության ինստիտուտի տնօրեն Պավել Ավետիսյանն իր հերթին ընդգծեց, որ հայ արտադրողները կարող են համալիրի գտածոները որպես գովազդ օգագործել իրենց ապրանքանիշների համար:

«Օրինակ, մեր գինեգործները կարող են Հայաստանում հայտնաբերված աշխարհի ամենահին գինեգործության փաստը որպես գովազդ օգտագործել իրենց ապրանքների համար»,- ասաց նա:
Վերջում գիտնականները նշեցին, որ «Արենի 1» քարանձավային համալիրն, ըստ էության, աշխարհի ամենաէկզոտիկ, մշակութային հուշահամալիրն է: -0-