ԵՐԵՎԱՆ, 26 նոյեմբերի. /Նովոստի-Արմենիա/. Բյուրականի աստղադիտարանն այս տարի, հնարավոր է, Միջազգային աստղագիտական միության (ՄԱՄ) տարածաշրջանային աստղագիտական կենտրոն դառնա, ուրբաթ հայտնեց Հայկական աստղագիտական ընկերության փոխնախագահ Արեգ Միքայելյանը:
«Մենք հայտ ենք ներկայացրել ՄԱՄ, և այս տարի նիստի ժամանակ գործող կոմիտեն պետք է վերջնական որոշում կայացնի»,- ասաց Միքայելյանը:
ՄԱՄ-ը վերջերս աստղագիտության միջազգային զարգացման ռազմավարական ծրագիր է հռչակել, որի համաձայն աշխարհը ութ տարածաշրջանների է բաժանվում, և Հայաստանը ներառված է դրանցից մեկում և կարող է հավակնել տարածաշրջանային աստղագիտական կենտրոնի կարգավիճակ ստանալուն:
Նա նշեց, որ ՄԱՄ-ը մեկ տարածաշրջանում համախմբել է Մերձավոր Արևելքի և Հյուսիսային Աֆրիկայի երկրները, և յոթ հավակնորդ կա մեր տարածաշրջանից:
«Բոլոր հավակնորդները ոչնչով չեն գերազանցում մեզ, նրանց առավելությունը միայն նրանում է, որ տարածաշրջանային կենտրոն ստեղծելու համար նրանք ավելի շատ ֆինանսավորում են ստանում սեփական կառավարությունից, իսկ ՄԱՄ հանձնաժողովը մեծ ուշադրություն է դարձնում նաև աստղադիտարանների ֆինանսական դրությանը»,- ասաց Միքայելյանը:
Նա ընդգծեց, որ մեր հիմնական խաղաքարտերը Բյուրականի աստղադիտարանի ավանդույթներն են ու մեծ աստղաֆիզիկոս Վիկտոր Համբարձումյանի հեղինակությունը:
ՀՀ գիտությունների ազգային ակադեմիայի Բյուրականի աստղագիտական աստղադիտարանի տնօրեն Հայկ Հարությունյանն իր հերթին նշեց, որ Հայաստանը տարածաշրջանային աստղագիտական կենտրոն դառնալու բոլոր հնարավորություններն ունի:
«Այն, որ ամեն տարի տարբեր երկրներից մեզ մոտ գիտնականներ են ժամանում, բարձրագույն կրթություն ստանալու կամ դիսերտացիա պաշտպանելու համար, այն, որ Բյուրականի աստղագիտական աստղադիտարանը զինված է տարածաշրջանի լավագույն օպտիկական աստղադիտակներով և գերազանց ենթակառուցվածք ունի և միշտ համագործակցում է տարբեր երկրների հետ, թույլ է տալիս ասել, որ մենք տարածաշրջանում աստղագիտական կենտրոն դառնալու բոլոր հնարավորություններն ունենք»,- ասաց նա:
Տնօրենը նաև նշեց, որ այժմ աստղադիտարանն աշխատում է երեք հիմնական ուղղություններով՝ դառնալ տարածաշրջանային աստղագիտական կենտրոն, աստղադիտարանի հիման վրա ազգային գիտակրթական և ռելատիվիստիկ աստղաֆիզիկայի տարածաշրջանային կենտրոն ստեղծել:
Բյուրականի աստղաֆիզիկական աստղադիտարանը հիմնադրվել է 1946թ. Արագած լեռան վրա։ Հայկական աստղագիտության բարգավաճման նշանակալի փուլը կապված է հռչակավոր գիտնական, ակադեմիկոս Վիկտոր Համբարձումյանի անվան հետ։ Բյուրականում անցկացվող գիտական ուսումնասիրությունները համաշխարհային ճանաչում են ստացել, դրանց հիման վրա ստեղծվել են աստղաֆիզիկայի նոր ուղղություններ։ --0—
