Հայաստանում կսահմանվի հաղորդակցման ծառայությունների հատուկ «Կրթական» սակագին

ԵՐԵՎԱՆ, 4 մարտի․ /Նովոստ-Արմենիա/․ Հայաստանում կսահմանվի հաղորդակցման ծառայությունների մատչելի «կրթական» սակագին:

«Կապի օպերատորների հետ ձեռք ենք բերել պայմանավորվածություններ հատուկ մատչելի` ԿՐԹԱԿԱՆ սակագին սահմանելու համար։ Տեխնիկական վերջին կարգավորումներից հետո կներկայացնենք մանրամասներ»,- գրել է Կրթության, գիտության, մշակույթի և սպորտի նախարար Արայիկ Հարությունյանը Facebook-յան իր էջում։


Հայաստանում կորոնավիրուսի տարածման հետ կապված՝ երկրի բոլոր ուսումնական հաստատությունները անցել են հեռավար ուսուցման: Ինչպես ավելի վաղ նշել էր Հարությունյանը, հեռավար կրթության գործընթացը շատ արդյունավետ է, և ներգրավվածության աստիճանը շարունակում է աճել, այնուամենայնիվ, գործընթացի լիարժեք իրականացման համար հիմնական խնդիրը որոշ ուսուցիչների և դպրոցականների համար համակարգիչների կամ հաղորդակցման հնարավորությունների բացակայությունն է:

Մարտի 16-ից ապրիլի 14-ը Հայաստանում, կորոնավիրուսի տարածումը կանխելու նպատակով, գործում է արտակարգ դրություն: Արտակարգ դրության պայմաններում Հայաստանում ազատ տեղաշարժի և տնտեսական գործունեության որոշ տեսակների սահմանափակումները (նախկինում գործում էր մարտի 24-ից մարտի 31-ը) երկարաձգվել են մինչև ապրիլի 12-ը ներառյալ: 

Ապրիլի 4-ի դրությամբ՝ Հայաստանում կա կորոնավիրուսով վարակման 770 հաստատված դեպք։ Բուժվել է 43 մարդ, 7-ը, ցավոք, մահացել։-0-