ԵՐԵՎԱՆ, 17 հունիսի. /Նովոստի–Արմենիա/. Գիտնականները պարզել են, որ ցածր ջերմաստիճաններում պահվող աղացած սուրճն առավելագույնս ուժեղացնում է ըմպելիքի համն ու բույրը։
Իրենց գիտափորձերի արդյունքների մասին նրանք հայտնել են Scientific Reports ամսագրի էջերին։ Ինչպես գրում է
Lenta.ru–ն, հետազոտության մասին հակիրճ պատմել է Gizmodo պարբերականը։
Սուրճի պատրաստումը, ինչպես հայտնի է, քիմիական բարդ գործընթաց է։ Մարդու նպատակը բոված հատիկներից առավելագույն թվով օրգանական մոլեկուլներ ստանալն է։ Սուրճի համը և բույրը կախված է բազմաթիվ գործոններից, այդ թվում ջրի քիմիական կազմությունից, մակերևույթի մակերեսից և, ինչպես պարզել են գիտնականները, հատիկների ջերմաստիճանից բովելու փուլում։
Մեծ Բրիտանիայի Բատայի համալսարանի գիտնականները սուրճի հատիկները բովել են տարբեր ջերմաստիճաններում` սենյակայինից մինչև շատ ցածր (-196 աստիճան ըստ Ցելսիուսի)։ Պարզվել է, որ սառը բովման դեպքում (-22 և ավելի ցածր) սուրճն ավելի համեղ է դառնում։ Պատճառն այն է, որ սառեցման ժամանակ մոլեկուլներն ավելի խիտ են միմյանց կպնում, ինչի շնորհիվ համն ու բույրն ավելի ինտենսիվ է դառնում։
Բացի այդ, գիտնականները պարզել են, որ ըմպելիքի համային որակներն ուժեղացնում են աղացած սուրճի մանր և ձևով միանման մասնիկները։ Աղալու ժամանակ պետք է հասնել առավելագույն միատարրության, նշում է հոդվածի համահեղինակ Կրիստոֆեր Հենդոնը (Christopher Hendon)։ Իսկ սառեցումն օգնում է ավելի շատ սուրճ ստանալ հատիկներից` եփելու վրա ավելի քիչ ժամանակ ծախսելով։
2016 թվականի հունիսի 16–ին Առողջապահության համաշխարհային կազմակերպությանն առընթեր Քաղցկեղի ուսումնասիրման միջազգային գործակալությունը չափազանց տաք սուրճի և թեյի օգտագործումը կերակրափողի քաղցկեղի հավանական պատճառ է անվանել հենց ջերմաստիճանի, ոչ թե ընպելիքների քիմիական կազմի պատճառով։ -0-
