Ասպիրինը կյանքը երկարացնող միջոց է. գիտնականներ

ԵՐԵՎԱՆ, 4 դեկտեմբերի. /Նովոստի-Արմենիա/. Տարեց մարդիկ, ում համար բարձր է սիրտ-անոթային հիվանդություններից մահանալու ռիսկը, կարող են երկարացնել իրենց կյանքը՝ օրական ասպիրինի (ացետիլսալիցիլային թթու) փոքր չափաբաժիններ ընդունելով:

Այսպիսի եզրակացության են եկել Հարավային Կարոլինայի համալսարանի գիտնականները: Հետազոտության արդյունքների մասին պատմում է EurekAlert!, գրում է Lenta.ru-ն:

Ասպիրինի երկարատև էֆեկտը գնահատալու համար մասնագետները վերլուծել են մի քանի ազգային հետազոտությունների տվյալները: Նրանց հաջողվել է ներկայացնել ասպիրին ընդունող տարեց ամերիկացիների առողջության փոփոխության երկու սցենար: Միաժամանակ, հաշվի էին առնվում այնպիսի ցուցանիշներ, ինչպիսիք են՝ քրոնիկ հիվանդությունները, մարմնի քաշի ինդեքսը և մահացությունը:

Առաջին սցենարում գնահատվում էին առողջության համար օգուտը, եթե 45-79 տարեկան տղամարդիկ և 55-79 տարեկան կանայք ընդունեին ասպիրին, երբ դրա ընդունումից պոտենցիալ օգուտը գերակշռում է պոտենցիալ վնասն աղիներում արյունահոսությունների պատճառով: Երկրորդ սցենարում գիտնականները ենթադրել են, որ 51 տարեկանից բարձր ԱՄՆ բոլոր բնակիչներն ամեն օր ընդունում են ասպիրին՝ չնայած ցուցումներին:

Պարզվել է, որ եթե ցուցումներին հետևելու դեպքում կարելի է կանխել սիրտ-անոթային հիվանդությունների 11 դեպք և 51-79 տարեկան յուրաքանչյուր հազար ամերիկացիներին բաժին ընկած քաղցկեղի չորս դեպք:

Կյանքի միջին տևողությունը կավելանա 0,3 տարով: Արդյունքում հազար մարդուց ութը կհասնի 80 տարեկանի և ևս երեքը՝ 100 տարեկանի: -0-