ԵՐԵՎԱՆ, 4 մայիսի. /Նովոստի–Արմենիա/. ՀՀ տրանսպորտի և կապի նախարարությունում չորեքշաբթի կայացավ «.հայ» հայատառ դոմենային գոտու բացման շնորհանդեսը, հաղորդում է գերատեսչության մամուլի ծառայությունը։
«Այսօր մեր երկիրը կանգնած է լրջագույն մարտահրավերների առջև, և հայատառ դոմենային գոտու աշխատանքի սկիզբը կարող է իր կարևոր դերն ունենալ՝ բոլորիս միավորելով մեր ազգային արժեքների շուրջը», – հայտարարել է ՀՀ տրանսպորտի և կապի նախարարի տեղակալ Գագիկ Թադևոսյանը։ Նրա խոսքով` «.հայ» դոմենային գոտում «նախագահ.հայ»-ը կլինի առաջին պաշտոնական հայատառ դոմենը:
Մամուլի ծառայությունից նշեցին, որ «.հայ» դոմենային անվան օգտագործումը կխթանի հայկական ստեղնաշարի օգտագործումը Սփյուռքում, հայկական տառատեսակների լայն ներդրումը ժամանակակից բջջային սարքերում, թույլ կտա զարգացնել հայերենի իմացության մակարդակը համացանցում:
Հայատառ համացանցային դոմենային գոտին տարածաշրջանում առաջիններից է՝ ստեղծվող կիրիլիկ դոմենային գոտիների հետ համընթաց։ Սա աշխարհի հայության համար կարևոր նշանակություն ունեցող իրադարձություն է, որը համացանցից օգտվողներին հնարավորություն կտա տեղեկությունը համացանցում տարածել նաև մեսրոպատառ «.հայ» դոմենի օգտագործմամբ:–0–
