«Օրինաց երկիր» կուսակցության նախընտրական ցուցակը կքննարկվի կուսակցության՝ մարտի 3-ին կայանալիք համագումարի ընթացքում, երկուշաբթի լրագրողներին հայտնեց «Օրինաց երկիր» կոալիցիոն կուսակցության խմբակցության ղեկավար Հեղինե Բիշարյանը:
Ըստ նրա, կուսակցության համագումարի ընթացքում կքննարկվեն բոլոր նախընտրական հարցերը:
«Մեր կուսակցությունը մրցակցային է եղել 15 տարի շարունակ և մասնակցել է բոլոր ընտրություններին՝ ներկայացնելով իր ծրագրերը: Կարծում եմ, որ «Օրինաց երկիր» կուսակցության առաքելությունն ու հաջողության գրավականն իր կատարած աշխատանքն է»,- ասաց նա:
Ըստ Բիշարյանի, կուսակցության ներկայացրած ծրագիրն ուղղված կլինի որոշակի սոցիալական շերտի շահերին և կկարողանա ավելացնել իր ընտրողների վստահությունը: Նա նշեց նաև, որ կուսակցության ընտրողների քանակը զգալիորեն կավելանա, քանի որ վերջին երեք տարիների ընթացքում կուսակցությունը որոշակի առաջընթաց է գրանցել:
«Մեր երկրում բազմաթիվ սոցիալական խնդիրներ կան, և մեր խնդիրը դրանք լուծելն է: Վստահ եմ, որ այս անգամ մենք կնվաճենք ժողովրդի վստահությունը և կրկին կծառայենք նրան»,- նշեց նա:
Նրա խոսքով՝ «Օրինաց երկիր» կուսակցության ընտրական ցուցակում կընդգրկվեն բացառապես ակտիվ քաղաքական գործիչները, ովքեր վայելում են ընտրողների վստահությունը:
«Մենք ցանկանում ենք, որ Հայաստանն օրենքների երկրի վերածվի, և դա մեր կուսակցության առաքելությունն ենք համարում»,- հայտնեց Բիշարյանը:
Միաժամանակ Բիշարյանը հայտնեց, որ կուսակցությունը հավանաբար մեծամասնական համակարգով թեկնածուներ չի առաջադրի բոլոր տեղամասերում:
«Ցանկացած քաղաքական ուժի համար նպատակահարմար չեմ համարում բոլոր 41 ընտրական տեղամասերում ընտրություններին մասնակցելը, քանի որ յուրաքանչյուր քաղաքական ուժի համար մեծամասնական համակարգով առաջադրվելը բարդություն է ներկայացնում»,- ասաց նա:
Բիշարյանի կարծիքով՝ ընտրությունների ընթացքում ընդդիմությունը նույնպես որոշակի տեղ կզբաղեցնի խորհրդարանում, և դա դրական ազդեցություն կունենա օրենսդրական մարմնի աշխատանքի վրա:
Նա հիշեցրեց նաև, որ 2013թ.-ի նախագահական ընտրություններին ՕԵԿ-ը կսատարի գործող նախագահ Սերժ Սարգսյանին:
Հայաստանում ԱԺ ընտրությունները կանցկացվեն 2012 թվականի մայիսին:--0-
