ԵՐԵՎԱՆ, 1 նոյեմբերի./Նովոստի-Արմենիա/. ՀՀ վարչապետ Նիկոլ Փաշինյանը Al Jazeera հեռուստաալիքին տված հարցազրույցում պատմել է Ղարաբաղյան հակամարտության կարգավորման համատեքստում Ռուսաստանի և ԱՄՆ-ի հարաբերությունների մասին:
Загружается новость ... "Лево"
Նա նշել է, որ Ռուսաստանը Մինսկի խմբի ձևավորման օրից եղել է համանախագահող երկիր, միջնորդ երկիր, և այդպիսով ունեցել է որոշակի չեզոքություն պահպանելու պարտավորություն:
Միաժամանակ, նա անհեթեթություն է անվանել հայտարարություններն այն մասին, որ իր՝ իշխանության գալուց հետո Ռուսաստանի հետ կապը, որը նախկինում եղել է ավելի մտերիմ և դաշնակից Հայաստանի հետ, թուլացել է:
«Գիտեք, դա անհեթեթ մեղադրանք է: Որովհետև Ռուսաստանը ինչպես եղել է Հայաստանի ռազմավարական դաշնակիցը, այնպես էլ շարունակում է մնալ Հայաստանի ռազմավարական դաշնակիցը: Հայաստանի ռազմավարական դաշնակից լինելու հարցում Ռուսաստանը չեզոքություն չունի»,- հայտնել է Փաշինյանը:
Ընդ որում նա նշել է, որ Ռուսաստանի իշխանությունները և նախագահ Պուտինը մի քանի անգամ հայտարարել են, որ անհրաժեշտության դեպքում Հայաստանի Հանրապետության նկատմամբ Ռուսաստանն իր անվտանգային պարտավորությունները կկատարի:
«Ղարաբաղի հարցում, ես արդեն ասացի, նախկինում էլ հենց Մինսկի խմբի ձևավորման օրից Ռուսաստանը եղել է համանախագահող երկիր, միջնորդ երկիր, և այդպիսով ունեցել է որոշակի չեզոքություն պահպանելու պարտավորություն: Եվ մինչև հիմա նրա այդ կարգավիճակը չի փոխվել»,- հայտնել է վարչապետը:
Ինչ վերաբերում է Արևմուտքի հետ շփումներին և մարտական գործողությունների սկզբից ԱՄՆ նախագահի հետ կապի բացակայությունից, Փաշինյանը նշել է, որ ինքը մշտական կապի մեջ է Ֆրանսիայի նախագահի հետ, Ամերիկայի Միացյալ Նահանգների պետքարտուղարի հետ, ԱՄՆ նախագահի անվտանգության գծով խորհրդականի հետ:
«Մենք ընդհանրապես այս ընթացքում աշխատում ենք, որպեսզի ներկայացնենք միջազգային հանրությանը տեղի ունեցողի էությունը»,- նշել է Փաշինյանը: -0-
