ԵԽԽՎ-ում հայկական պատվիրակության ղեկավարը չի ձգտում զբաղեցնել ԱԺ խոսնակի պաշտոնը

ԵՐԵՎԱՆ, 2 նոյեմբերի. /Նովոստի-Արմենիա/. ՀՀ ԱԺ պետաիրավական հարցերի մշտական հանձնաժողովի նախագահ, ԵԽԽՎ-ում հայկական պատվիրակության ղեկավար Դավիթ Հարությունյանը չորեքշաբթի լրագրողներին հայտարարել է, որ ՀՀ ԱԺ խոսնակի պաշտոնը չի մտնում իր նախապատվությունների շրջանակի մեջ:

Նախօրեին ՀՀ ԱԺ խոսնակ Հովիկ Աբրահամյանը հայտարարել է հրաժարական տալու իր մտադրության մասին՝ 2012 թ.-ին կայանալիք խորհրդարանական ընտրություններից առաջ ՀՀԿ նախընտրական շտաբը գլխավորելու նպատակով: Տեղական լրագրողներն ու փորձագետները ՀՀ ԱԺ խոսնակի պաշտոնի հավանական թեկնածու են համարում Դավիթ Հարությունյանին:

«Եթե ձեզ հետաքրքրում են իմ նախապատվություններն, ապա այդ պաշտոնը (խոսնակ) չի մտնում դրանց շրջանակի մեջ, և ես հետաքրքրված չեմ այդ պաշտոնով: Կարծում եմ, որ կոռեկտ չէ քննարկել այս հարցը, հուսով եմ, որ ինձ այդ պաշտոնը չեն առաջարկի», - ասել է Հարությունյանը:

Նրա խոսքերով՝ խոսնակի պաշտոնը դեռ չի ազատվել, և այդ հարցը նոր պետք է քննարկվի (նոյեմբերի 14-ին կայանալիք խորհրդարանի նիստի ժամանակ):

«Իրավական տեսակետից խոսնակը կարող է միաժամանակ զբաղեցնել նախընտրական շտաբի ղեկավարի պաշտոնը: Այս որոշումը (Աբրահամյանի հրաժարականի մասին) ընդունվել է՝ ելնելով քաղաքական նպատակահարմարությունից, այլ ոչ թե օրենքի պահանջներից», - ասել է Հարությունյանը:

Նա նաև նշել է, որ չնայած նախընտրական արշավը դեռ չի մեկնարկել, քաղաքական ուժերն արդեն կենտրոնացնում են իրենց ռեսուրսները:

Հայաստանում վերջին օրերին կադրային լուրջ փոփոխություններ են տեղի ունեցել: Նախօրեին իր հրաժարականի մասին է հայտարարել ՀՀ ԱԺ խոսնակ Հովիկ Աբրահամյանը, ով 2012 թ.-ին կայանալիք խորհրդարանական ընտրություններից առաջ կգլխավորի ՀՀԿ-ի նախընտրական շտաբը:

Երեքշաբթի ՀՀ նախագահ Սերժ Սարգսյանը պաշտոնից ազատեց ՀՀ ոստիկանապետ Ալիկ Սարգսյանին՝ նրա տեղը նշանակելով ՀՀ պաշտպանության նախկին փոխնախարար Վլադիմիր Գասպարյանին:

Բացի այդ, հոկտեմբերի 28-ին զբաղեցրած պաշտոնից հեռացավ Երևանի քաղաքապետ Կարեն Կարապետյանը: Քաղաքապետի պաշտոնին ՀՀԿ-ն առաջարկել է փոխքաղաքապետ Տարոն Մարգարյանի թեկնածությունը, ով 2007 թ.-ին մահացած ՀՀ նախկին վարչապետ Անդրանիկ Մարգարյանի որդին է:-0-