Forbes-ը գրել է, թե ինչու Կարապետյանի գործը միայն միլիարդատիրոջ և ՀՀ վարչապետի միջև անձնական հակամարտությունը չէ

ԵՐԵՎԱՆ, 20 հունիսի․/Նովոստի–Արմենիա/․ Հայաստանի ներքաղաքական կյանքի գլխավոր թեման  դարձել է վարչապետ Նիկոլ Փաշինյանի և Հայ Առաքելական եկեղեցու առաջնորդ Գարեգին II-ի միջև առճակատումը։ Մոսկվայի միջազգային հարաբերությունների պետական  ինստիտուտի առաջատար գիտաշխատող Սերգեյ Մարկեդոնովը forbes.ru-ում հրապարակված  հոդվածում գրել է, որ այս հակամարտությունը, ինչպես ձագար, նոր մասնակիցներ է ներգրավում։ Նրանցից մեկը 59-ամյա Սամվել Կարապետյանն էր՝ միլիարդատեր և «Տաշիր» հոլդինգի նախագահը։ Ոչ պակաս կարևոր է նաև այն, որ նա ՌԴ  քաղաքացի է, որը Forbes-ում  ռուս միլիարդատերերի վարկանիշում զբաղեցնում է 44-րդ տեղը. նրա կարողությունը գնահատվում է 3,2 միլիարդ դոլար։

«Իշխող կուսակցության և անձամբ վարչապետի վարկանիշը նվազում է՝ հասնելով 2018 թ.-ի  «թավշյա հեղափոխությունից» հետո ողջ ժամանակահատվածի պատմականորեն ամենացածր մակարդակին։ Սակայն կա մի նրբերանգ։ Իշխանամետ ուժերի վարկանիշի անկումը չի հանգեցնում ընդդիմության ժողովրդականության աճի։ Այն ունի նոր մարդկանց և նոր գաղափարների պակաս», - ասվում է հոդվածում։

Նշվում է, որ այս իրավիճակում Հայ Առաքելական եկեղեցին, որը  ազգային ավանդույթների պահապանի համբավ ունի,  իրականում վերածվում է հասարակական-քաղաքական կյանքի այլընտրանքային կենտրոնի։ Եվ նրա կողմից այնպիսի գործիչների հայտնվելը, ինչպիսիք են Սամվել Կարապետյանը և նրա եղբայր Կարենը, նույնպես լրացուցիչ ռիսկի գործոն է թվում իշխանությունների համար։

«Այս ամենը վարչապետին նյարդայնացնում է և ստիպում առաջ գնալ։ Մինչև ընտրությունները դեռ ժամանակ կա, բայց ժողովրդականության բարձրացման  համար թաքնված ռեսուրսներ  չկան։ Եվ ընդդիմադիր թևում վառ  առաջնորդների բացակայությունը չի փրկում բազմաթիվ տհաճ հարցերի պատասխանելու պարտականությունից։ Տարածքների փոխանակումը խաղաղության դիմաց տեղի չի ունենում, և ներքաղաքական կյանքում   խաղադրույքները մեծանում են», - ասվում է հոդվածում։

Նշվում է, որ հայկական քաղաքական տաբուի խախտումը հանգեցնում է արմատականության։ Եվ Փաշինյանը չի կարող չհասկանալ սա։ 2018 թ.-ի տիրող իրավիճակին վերադառնալը, երբ Հայաստանի բոլոր առաջնորդները խաղաղ համակեցություն էին պահպանում, այլևս չի ստացվի։

«Եվ այստեղ է, որ ակնհայտ է դառնում   Փաշինյան քաղաքական գործչի հիմնական  խնդիրը։ Լինելով փայլուն մարտավար, պայծառ հռետոր, որը գիտի, թե ինչպես ճիշտ պահին մոբիլիզացնել իր կողմնակիցներին և իր խաղը պարտադրել ընդդիմադիրներին՝  նա ակնհայտ խնդիրներ է ունենում  ռազմավարության մեջ։ Հակառակ դեպքում, նա դժվար թե սկսեր հարցը տանել Ռուսաստանի հետ նոր վեճերի և հակասությունների՝ Երևանի հուսալի գործընկեր Իրանի ներկայիս թուլացման և Թուրքիա-Ադրբեջան տանդեմի դիրքերի ամրապնդման ֆոնին։ Ի վերջո, Մոսկվան չի կարողանա «Կարապետյանի գործը» երկրորդ պլան մղել՝ դեմքը փրկելու համար», - ասվում է հոդվածում։

Սամվել Կարապետյանի քրեական հետապնդման մասին

 «Տաշիր» ընկերությունների խմբի նախագահ Սամվել Կարապետյանը հունիսի 18-ի գիշերն իր առանձնատնից բերման է ենթարկվել ուժայինների կողմից։   Դիմելով առանձնատան մոտ հավաքված մարդկանց՝ Կարապետյանը հայտարարել է, որ աջակցում է եկեղեցուն։

«Ես եկեղեցու կողքին եմ, մեր ժողովրդի կողքին, թքած ունեմ իրենց վրա էլ, իրենց Էլեկտրական ցանցի վրա էլ, ամեն ինչ լավ է լինելու։ Ժողովուրդը մեկ է իր խոսքն ասելու է, իրենք հասկանալու են», – հայտարարել է Կարապետյանը։  

Դրան ի պատասխան՝ Փաշինյանը հայտարարել է․ «Հասունացել է պահը, երբ Հայաստանի էլեկտրական ցանցեր ՓԲԸ–ն պետք է ազգայնացվի (պետականացվի)։ Դա տեղի կունենա արագ և իմ հանձնարականն է ՀԷՑ–ի բոլոր աշխատակիցներին՝ բարեխղճորեն կատարել իրենց աշխատանքային պարտականությունները։ Ազգայնացումից (պետականացումից) հետո բարեխղճությունը հաշվի կառնվի»։

Հունիսի 17–ին Կարապետյանն իր կարծիքն էր հայտնել իշխանություն–եկեղեցի առճակատման հարցով։

«Մի փոքրիկ խմբակ, մոռանալով հայոց պատմությունը, հայ եկեղեցու հազարավոր տարիների պատմությունը, հարձակվել է հայ եկեղեցու վրա, հայ ժողովրդի վրա։ Ես միշտ եղել եմ հայոց եկեղեցու կողքին ու հայ ժողովրդի կողքին։ Եթե քաղաքական գործիչներին չհաջողվի, ապա մենք մեր ձևով ենք միջամտելու եկեղեցու դեմ արշավին», – հայտարարել է Կարապետյանը։

Դրանից հետո ուժայիններն օպերատիվ գործողություններ են սկսել Կարապետյանի երևանյան առանձնատանը։

Քննչական կոմիտեն գործարար Սամվել Կարապետյանին կալանավորելու միջնորդություն էր  ներկայացրել դատարան:  

Դատարանը բավարարել է  գործարարին երկու ամսով կալանավորելու ՔԿ միջնորդությունը։

Կարապետյանի փաստաբան Արմեն Ֆերոյանը հայտնել է, որ Սամվել Կարապետյանին մեղադրանք է առաջադրվել իշխանությունը զավթելու հրապարակային կոչեր հնչեցնելու հոդվածով։

«Հայաստանի էլեկտրական ցանցեր» ՓԲԸ-ն ներառված է «Տաշիր» ընկերությունների խմբի կազմում, որը պատկանում է ձեռնարկատեր և բարերար Սամվել Կարապետյանին։ ՀԷՑ-ը կառավարում է Հայաստանի միջին և ցածր լարման բաշխիչ ցանցերը